ក្រុមអ្នកបុរាណវិទូចិនជឿជាក់ថា រកឃើញសាកសព ឆាវ ឆាវ មេទ័ពដ៏ល្បីរបស់ចិន
ក្រុមអ្នកបុរាណវិទូចិនជឿជាក់ថា ពួកគេបានរកឃើញសាកសពរបស់អ្នកចម្បាំងដ៏ល្បីរបស់ចិនគឺមេទ័ព ឆាវ ឆាវ ហើយ ដែលបំណែកនៃសាកសពនេះត្រូវបានកប់នៅក្នុងបរិវេណចេតិយដ៏ធំមួយក្នុងខេត្តហឺណាន ប្រទេសចិន។ បំណែកនៃសាកសពនេះ ត្រូវបានគេជឿថា បានស្លាប់នៅអាយុជាង៦០ឆ្នាំ ហើយនៅក្បែរបំណែកសាកសពនោះក៏មានសាកសពមនុស្សស្រីពីរនាក់ផ្សេងទៀតដែរ ដែលក្នុងនោះមានសាកសពមួយបានស្លាប់ នៅអាយុជាង៥០ឆ្នាំ និងមួយទៀតបានស្លាប់នៅអាយុជាង២០ឆ្នាំ។
ហើយសាកសពទាំងពីរត្រូវបានគេជឿថា ទំនងជាភរិយារបស់មេទ័ព ឆាវ ឆាវ។ សូមបញ្ជាក់ថា មេទ័ព ឆាវ ឆាវ ត្រូវបានមហាជនទូទៅស្គាល់តាមរយៈខ្សែភាពយន្តប្រវត្តិសាស្ត្រដ៏ល្បីរបស់ចិនគឺរឿង “នគរទាំងបី”។ គាត់មានឈ្មោះជាភាសាអង់គ្លេស Cao Cao កើតនៅឆ្នាំ ១៥៥ និងបានស្លាប់នៅក្នុងថ្ងៃទី១៥ ខែមិនា ឆ្នាំ ២២០។ គាត់ជាអ្នកដឹកនាំដ៏ឆ្លាតជាងគេម្នាក់ក្នុងលោក។ បើទោះជាគាត់មិនអាចបង្រួបបង្រួមនគរទាំងបីបានក៏ពិតមែន តែគាត់នៅតែឆ្លាត គឺឆ្លាតត្រង់ថាគាត់សាហាវ មានល្បិចកល ពិសពុល ពុតត្បុត យល់កាលទេសៈ ថែមទាំងចេះប្រើមនុស្សឲ្យអស់ពីសម្ថភាពទៀតផង។
មុនពេលគាត់ស្លាប់គាត់បានប្រាប់ថា ពេលរៀបចំពិធីបុណ្យសពគាត់ ត្រូវរៀបចំឲ្យមានមឈូសចំនួន ៧២ និងត្រូវយកមឈូស ទាំង ៧២ នោះទៅកប់នៅកន្លែងផ្សេងៗគ្នា ដើម្បីចៀសវាគេទៅរំខានផ្នូរពិតប្រាកដរបស់គាត់ ហេតុដូចនេះហើយទើបគេពិបាកស្វែងរកកន្លែងបញ្ចុះសាកសពពិតរបស់គាត់ខ្លាំងណាស់៕
ភក្តី
ប្រភព៖ medium