Google ទើបតែបានឱ្យដឹងនៅក្នុងប្លក់របស់ខ្លួនថា ពួកគេបានបិទគណនី YouTube ចំនួន ២១០ ដែលក្រុមហ៊ុនបាននិយាយថា មានអាកប្បកិរិយាជាយុទ្ធនាការផ្សព្វផ្សាយព៌តមានមិនពិត បង្ហោះវីដេអូទាក់ទងនឹងការតវ៉ានៅហុងកុង។ Google បានលុបគណនីទាំងនេះ ចំពេលដែលគណនី Facebook និង Twitter ជាច្រើនត្រូវបានបិទ កាលពីដើមសប្តាហ៍នេះ។ ទាំង Facebook និង Twitter ថ្មីៗនេះបានរកឃើញនូវសកម្មភាពមិនប្រក្រតី និងផ្អាកគណនីមួយចំនួន ដែលក្រុមហ៊ុនទាំង ២ ជឿថា បានដំណើរការដោយរដ្ឋាភិបាលចិន និងបានបង្កើតឡើងដើម្បីធ្វើឱ្យមានការសង្ស័យ និងធ្វើឱ្យអន្តរាយដល់ការតវ៉ា ដែលកំពុងបន្តនៅហុងកុង។

គួរឱ្យដឹងដែរថា Twitter បានផ្អាកគណនីជិត ១,០០០ ដែលជាប់ទាក់ទងនឹងប្រទេសចិន ហើយ Facebook ក៏បានលុបចោលទំព័រ ក្រុម និងគណនីផ្សេងៗច្រើនជាង ១,០០០ ដែលទាក់ទងនឹងកិច្ចប្រឹងប្រែងផ្សព្វផ្សាយព័ត៌មានប្រឆាំងនឹងការតវ៉ានៅហុងកុងផងដែរ។ Shane Huntley មកពីក្រុមវិភាគការគំរាមកំហែងរបស់ Google ​បានសរសេរនៅលើប្លក់ថា៖ “យើងបានរកឃើញការប្រើប្រាស់ VPNs និងវិធីសាស្រ្តផ្សេងទៀត ដើម្បីក្លែងបន្លំប្រភពដើមនៃគណនីទាំងនេះ និងសកម្មភាពផ្សេងទៀត ដែលជាទូទៅទាក់ទងនឹងប្រតិបត្តិការការផ្សព្វផ្សាយព័ត៌មានមិនពិត” ។ វាគឺជាផ្នែកមួយនៃការខិតខំបន្តរបស់យើង ដើម្បីការពារបូរណភាពនៃបណ្ដាញផ្សព្វផ្សាយរបស់យើង និងសុវត្ថិភាព និងភាពឯកជនរបស់អ្នកប្រើប្រាស់របស់យើង៕

អត្ថបទ៖ លីដា