ក្រុង Khon Kaen របស់ថៃ រងការវាយប្រហារពីព្យុះ Podul យ៉ាងចាស់ដៃ បណ្ដាលឱ្យមានទឹកជំនន់ធំបំផុតក្នុងរយៈពេល ៤០ឆ្នាំ

ថៃ៖ ខេត្តមួយចំនួននៅផ្នែកខាងលើនៃប្រទេស បានទទួលរងការប៉ះទង្គិចយ៉ាងខ្លាំង ដោយសារភ្លៀងធ្លាក់ខ្លាំងបណ្តាលមកពីព្យុះត្រូពិក Podul ចាប់តាំងពីយប់ថ្ងៃសុក្រ ហើយខេត្ត Khon Kaen ស្ថិតក្នុងតំបន់ដែលរងគ្រោះខ្លាំងជាងគេបំផុត។ វាត្រូវបានគេរាយការណ៍ថា ទឹកជំនន់នៅផ្នែកខ្លះនៃភាគឦសានមានកម្ពស់រហូតដល់ទៅ ៣ម៉ែត្រ ឯណោះ។ តំបន់ជាច្រើនត្រូវបានជន់លិច ជាពិសេសសហគមន៍ Non Sawang និងសហគមន៍ Non Sa-ard ក្នុងឃុំ Nai Mueang នៃស្រុក Ban Pai ។

ប្រជាជនបានប្រមូលផ្តុំគ្នានៅតាមដងផ្លូវក្នុងតំបន់ ដើម្បីរង់ចាំជំនួយពីអាជ្ញាធរ បន្ទាប់ពីផ្ទះរបស់ពួកគេត្រូវបានជន់លិចពេញមួយយប់។ គ្រួសារខ្លះត្រូវបានជាប់គាំង ហើយកំពុងអង្គុយរង់ចាំនៅលើដំបូល។ អ្នកស្រុកនៅទីនោះបានឱ្យដឹងថា ទឹកជំនន់នៅតែបន្ដជន់លិចតាំងពីម៉ោង ៨យប់ ថ្ងៃសុក្រ ហើយរហូតដល់ម៉ោង ១០ព្រឹក ថ្ងៃសៅរ៍នេះ ពួកគេមិនទាន់បានទទួលជំនួយនោះទេ។

នៅក្នុងវីដេអូក៏បានបង្ហាញដែរថា ទឹកបានជន់លិចខ្លាំងគ្រប់ទីកន្លែង ហើយផ្នែកខ្លះស្ទើរតែកប់ដំបូលឡានទៀតផង។ របាយការណ៍ក៏បានឱ្យដឹងដែរថា ការជន់លិចក្នុងតំបន់នៅឆ្នាំនេះមានការពង្រីកបន្ថែម ដែលធ្វើឱ្យប៉ះពាល់ដល់ប្រជាជនក្នុងសហគមន៍រហូតដល់ ១,០០០គ្រួសារ ហើយវាជាការជន់លិចធំបំផុតក្នុងរយៈពេល ៤០ឆ្នាំមកនេះ៕

អត្ថបទ៖ លីដា