រំភើបណាស់! យុវតីវ័យ១៤ឆ្នាំព្រមទាំងម្តាយនាង ជាជនរងគ្រោះរងការជះទឹកអាស៊ីត បានទៅវះកាត់ព្យាបាលរបួសដោយឥតគិតថ្លៃនៅសហរដ្ឋអាមេរិក

ពិតជារឿងមួយគួរឲ្យរំភើបដោយយុវតី ព្រមទាំងម្តាយ ដែលជាជនរងគ្រោះដោយការជះទឹកអាស៊ីតនឹងទទួលបានជីវិតថ្មី ដោយនាងទទួលបានឱកាសចេញទៅព្យាបាលនៅសហរដ្ឋអាមេរិក។ នេះយោងតាមការបង្ហោះរបស់ លោក ស្កុត ណេសិន (Scott Neeson) ជាប្រធានអង្គរមូលនិធិកុមារកម្ពុជា បានឲ្យដឹងថា យុវតី ម៉ាលីតា អាយុ១៤ឆ្នាំ ជាសិស្សរបស់ CCF នឹងហោះហើរទៅកាន់សហរដ្ឋអាមេរិកដើម្បីព្យាបាលរបួសដែលទទួលរងការវាយប្រហារដោយទឹកអាស៊ីត។ ក្នុងនោះអ្នកម្តាយរបស់នាងដែលពិការភ្នែក និងរបួសខ្លាំង ក៏នឹងត្រូវធ្វើដំណើរជាមួយនាងដើម្បីទទួលការព្យាបាលផងដែរ។

ជំនួយព្យាបាលនេះអាចធ្វើទៅបានដោយសារតែការសហការជាដៃគូ CCF និង Face Forward International ដែលជាអង្គការសប្បុរសធម៌មួយមានមូលដ្ឋាននៅសហរដ្ឋអាមេរិក ដែលធ្វើការវះកាត់ជូនជនរងគ្រោះនៃអំពើហឹង្សាមកពីជុំវិញពិភពលោក។ ដោយស្ថាបនិកនិងជានាយកប្រតិបត្តិនៃ Face Forward International លោកស្រី Deborah Alessi បានធ្វើដំណើរមកទីក្រុងភ្នំពេញ ក្នុងខែកក្កដាកន្លងទៅដើម្បីជួបលោក Scott Neeson ដើម្បីចាប់ដៃសហការគ្នាដើម្បីជួយកុមារ និងស្រ្តីដែលងាយរងគ្រោះនៅកម្ពុជា ហើយ ម៉ាលីតា និងម្តាយនាង ក៏ក្លាយជាជនទី១ ដែលទទួលបានការថែទាំជាពិសេសពី Face Forward International នៅក្នុងគម្រោងនេះ ។

ម៉ាលីតា និងម្តាយឈ្មោះចិន្តា ដែលពិការភ្នែកបានធ្វើដំណើរទៅសហរដ្ឋអាមេរិកនៅថ្ងៃទី៥ ខែកញ្ញា ឆ្នាំ២០១៩ ដើម្បីទទួលការព្យាបាលនិងថែទាំពីអ្នកជំនាញវេជ្ជសាស្ត្រនៅ Los Angeles ។ អង្គការ Face Forward International នឹងត្រូវចំណាយលើរាល់ការធ្វើដំណើរ ការវះកាត់ ការប្រឹក្សាយោបល់ ថ្លៃយន្តហោះ ព្រមទាំងការស្នាក់នៅ ហើយការចំណាយជូនជនរងគ្រោះរងដោយសារទឹកអាស៊ីតអាចនឹងចំណាយប្រមាណជា ៣០ម៉ឺនដុល្លារអាមេរិក។ ម៉ាលីតានិងម្តាយរបស់នាង អាចនឹងស្នាក់នៅសហរដ្ឋអាមេរិកប្រហែលជារយៈពេល ៣ខែ។

គួររំលឹកថា យុវតី ម៉ាលីតា បានរងរបួសដោយសារការវាយប្រហារដោយទឹកអាស៊ីតកាលពីខែកុម្ភៈ ឆ្នាំ២០០៨ នៅពេលនាងមានអាយុ ២ឆ្នាំនិង ៨ខែ ដោយរងការរលាកពេញខ្លួនប្រាណរួមទាំងមុខនិងដៃ ម្តាយរបស់នាងរងគ្រោះធ្ងន់និងពិការភ្នែក។ ក្រោយមកបុរសពីរនាក់ជាជនបង្កក៏ត្រូវបានចាប់ខ្លួននិងជាប់ពន្ធនាគារ។ ហើយលោក ស្កត ណេសសិន ក៏ជួប ម៉ាលីតា ជាលើកដំបូងនៅពេលនាងមានអាយុ ៦ឆ្នាំ នៅស្ទឹងមានជ័យ ហើយនាងក៏ទទួលបានការឧបត្ថម្ភសិក្សារៀនសូត្រ ស្នាក់នៅពីអង្គការ CCF ចាប់តាំងពីពេលនោះមក៕

ប្រភព៖ CCF.org