រាជធានីភ្នំពេញ៖ នាព្រឹកថ្ងៃទី០៦ ខែមេសា ឆ្នាំ២០១៨នេះ នាវាដឹកអ្នកដំណើរពីព្រែកព្នៅ-តាខ្មៅ បានដាក់ដំណើរការឲ្យប្រើប្រាស់បណ្តោះអាសន្ន ក្រោមអធិប​តីភាពឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

ក្នុងឱកាសដាក់ឲ្យដំណើរការនាវាដឹកអ្នកដំណើរពីព្រែកព្នៅ ទៅតាខ្មៅនោះផងដែរ ឯកឧត្តមបានមានប្រសាសន៍ឲ្យដឹងថា ក្រសួងអនុញ្ញាតឲ្យប្រជាពលរដ្ឋធ្វើការជិះកាណូតនេះ ដោយឥតគិតថ្លៃចាប់ពីថ្ងៃនេះរហូតដល់ចុងខែកក្កដា ឆ្នាំ២០១៨។ ចំពោះ ចំណតនាវាអ្នកដំណើរពីភ្នំពេញទៅតាខ្មៅ ស្ថិតនៅក្នុងដំណើរ​ការសាងសង់ រួមមាន៖ ទីតាំងទី១៖ កំពង់ផែ ព្រែកព្នៅ, ទីតាំងទី២៖ កំពង់ផែ មុខឃ្លាំងសាំងឫស្សីកែវ ឬនៅទីលានប្រជាធិបតេយ្យ, ទីតាំងទី៣៖ កំពង់ផែ ផែបណ្តែត ទល់មុខផ្សាររាត្រី, ទីតាំងទី៤៖ កំពង់ផែ ណាហ្គា នៅក្បែរកោះពេជ្រ, ទីតាំងទី៥៖ កំពង់ផែ ភូមិដើមចាន់ នៅច្បារអំពៅ និងទីតាំងទី៦៖ កំពង់ផែ សួនច្បារតាខ្មៅ៕

អត្ថបទ៖ សេម