ព្រះពិធីបង្សុកូលឧទ្ទិសមហាព្រះកុសល ថ្វាយដួងព្រះវិញ្ញាណក្ខន្ធ សម្តេចរាជបុត្រីព្រះរៀម នរោត្តម បុប្ផាទេវី ក្នុងឱកាសខួបចម្រើនព្រះជន្មវស្សាគម្រប់ ៧៧ ព្រះវស្សា
នៅព្រឹកថ្ងៃទី០៨ ខែមករា ឆ្នាំ២០១៩ មានការរៀបចំធ្វើព្រះពិធីបង្សុកូលឧទ្ទិសមហាព្រះកុសល ថ្វាយដួងព្រះវិញ្ញាណក្ខន្ធ សម្តេចរាជបុត្រីព្រះរៀម នរោត្តម បុប្ផាទេវី ទេពនាថវដ្តីឯក ក្នុងឱកាសខួបថ្ងៃប្រសូត គម្រប់៧៧ព្រះវស្សា នៅក្នុងវត្តបទុមវតីរាជវរារាម។ ដោយមានការយាង និងអញ្ជើញចូលរួមដោយ សម្តេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ និងព្រះអង្គម្ចាស់ក្សត្រី ស៊ីសុវត្ថិ កល្យាណទេវី ព្រះបុត្រី នៃសម្តេចរាជបុត្រីព្រះរៀម ព្រមទាំងលោកគ្រូ អ្នកគ្រូ នាដការបាំព្រះរាជទ្រព្យជាច្រើនរូបផងដែរ។
សូមរំលឹកថាសម្ដេចរាជបុត្រី ព្រះរៀម នរោត្តម បុប្ផាទេវី បានយាងសោយព្រះពិរាល័យក្នុងព្រះជន្ម ៧៦ព្រះវស្សា នាវេលាម៉ោង ១២:៣០ នាទី ថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យព្រះរាជាណាចក្រថៃ ដោយជរាពាធ។ ព្រះអង្គ ព្រះប្រសូតនៅថ្ងៃទី០៨ ខែមករា ឆ្នាំ១៩៤៣ នារាជធានីភ្នំពេញ ទ្រង់ជាព្រះរាជបុត្រីច្បង នៃព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត និងអ្នកម្នាង ផាត់ កាញ៉ុល នាដការី នៃរបាំព្រះរាជទ្រព្យ៕
ប្រភព៖ Royal du Cambodge