សម្តេចតេជោ ហ៊ុន សែន បានមកដល់ទីក្រុងប៉េកាំងហើយ ល្ងាចនេះសម្តេចតេជោនឹងអញ្ជើញជួបជាមួយថ្នាក់ដឹកនាំចិន
នៅពេលនេះ សម្តេចតេជោ ហ៊ុន សែន បានអញ្ជេីញមកដល់ទីក្រុងប៉េកាំង នៃប្រទេសចិនប្រកបដោយសុវត្ថិភាពហេីយ ដោយមានលោក វ៉ាង យី រដ្ឋមន្រ្តីក្រសួងការបរទេសចិន និងមន្រ្តីជាន់ខ្ពស់ចិនជាច្រេីនរូប ព្រមទាំងមន្រ្តីការទូតកម្ពុជាប្រចាំប្រទេសចិន បានមកទទួលស្វាគមន៍នៅព្រលានយន្តហោះ។ ហើយនៅល្ងាចនេះ សម្តេចតេជោនាយករដ្ឋមន្ត្រី នឹងអញ្ជើញជួបជាមួយលោកនាយករដ្ឋមន្រ្តីចិន លី ខឺឈាង នៅម៉ោង ៥:១៥នាទីល្ងាច និងបន្ទាប់មកជួបជាមួយលោកប្រធានាធិបតីចិន ស៉ី ជិនពីង នៅម៉ោង៦:០០ល្ងាចនេះ មុននឹងវិលត្រឡប់ទៅប្រទេសកម្ពុជានៅយប់នេះ។
ទស្សនកិច្ចការងាររយៈពេល១ថ្ងៃ នៅថ្ងៃទី០៥ ខែកុម្ភៈ ឆ្នាំ ២០២០នេះ របស់សម្តេចតេជោ ហ៊ុន សែន បានធ្វើឡើងតបតាមការអញ្ជើញរបស់ របស់ លី ខឺឈាង នាយករដ្ឋមន្រ្តីចិន។ សូមរំលឹកថាកាលពីថ្ងៃទី០៣ ខែកុម្ភៈ ឆ្នាំ២០២០ នៅក្នុងឱកាសជួបសំណេះសំណាលជាមួយបងប្អូនប្រជាពលរដ្ឋខ្មែរ នៅប្រទេសកូរ៉េខាងត្បូង, សម្តេចតេជោ ហ៊ុន សែន បានប្រកាសថា សម្តេចនឹងទៅសួរសុខទុក្ខនិស្សិតខ្មែរ នៅទីក្រុងវូហាន ខេត្តហ៊ូប៉ី ប្រទេសចិន ប្រសិនបើរដ្ឋាភិបាលចិនអនុញ្ញាត ប៉ុន្តែនៅពេលនេះភាគីមិត្តចិន បានឆ្លើយតបវិញហើយថា ចិនមិនអាចរៀបចំដំណើររបស់សម្តេចទៅកាន់ទីក្រុង វូហាន បានទេ ប៉ុន្តែសម្តេចតេជោ ហ៊ុន សែន សម្រេចនឹងដឹកនាំគណៈប្រតិភូទៅកាន់ទីក្រុងប៉េកាំង មុននឹងត្រឡប់ទៅកាន់ប្រទេសកម្ពុជាវិញ៕
