លទ្ធផលត្រួតពិនិត្យរឹតបន្តឹងច្បាប់ចរាចរណ៍ផ្លូវគោកកាលពីយប់មិញ សរុបឃាត់បានអ្នកបើកបររថយន្ត និងម៉ូតូ ក្នុងស្ថានភាពស្រវឹងមានចំនួន ៤៤ នាក់, អ្នកបើកបរអត់ពាក់មួកសុវត្ថិភាព និងអត់កញ្ចក់ចំនួន ២៣៣ នាក់
ភ្នំពេញ ៖ ឯកឧត្តម ឧត្តមសេនីយ៍ឯក ស ថេត បានជម្រុញឱ្យមានការអនុវត្ត រឹតបន្តឹងច្បាប់ចរាចរណ៍ផ្លូវគោកឱ្យបានតឹងរឹងបំផុត មិនត្រូវរាថយនោះឡើយ។ ពោលត្រូវធ្វើសកម្មភាពឱ្យបានហ្មត់ចត់ អនុវត្តស្មើភាពគ្នា គ្មានការអន្តរាគមន៍នោះឡើយ ចំពោះអ្នកបើកបរល្មើសច្បាប់ចរាចរណ៍។ នៅយប់ថ្ងៃទី០៣ ត្រូវធ្វើឱ្យបានល្អជាងមុនថែមទៀត។
ក្រោយពីមានការចុះអនុវត្តច្បាប់ចរាចរណ៍ផ្លូវគោកនៅយប់ដំបូង គឺពិនិត្យឃើញថា កម្លាំងនគរបាលអនុវត្តច្បាប់បំពេញភារកិច្ចនៅខ្វះចន្លោះមួយចំនួន អនុវត្តការងារ បច្ចេកទេសជំនាញមិនទាន់សមស្របនោះឡើយ។ នេះបើតាមការលើកឡើងរបស់ ឯកឧត្តម ឧត្តមសេនីយ៍ឯក ស ថេត កិច្ចការងារនេះ ត្រូវកែប្រែសម្រួលឡើងវិញ ចាត់បែងចែងកម្លាំងឱ្យមានការទទួលខុសត្រូវរៀងៗខ្លួន អនុវត្តការងារឱ្យមានប្រសិទ្ធភាពនិងតម្លាភាព និងការគោរពច្បាប់ ។ នៅយប់ថ្ងៃទី២ នៃការរិតបន្តឹងអនុវត្តច្បាប់ចរាចរណ៍ ក៏មានលោកឧត្តមសេនីយ៍ត្រី សរ សំណាង ស្នងការរង ( រងរបួសស្រាល) លោកអនុសេនីយ៍ឯក លាង បណ្ឌិត នាយរងផ្នែក នៃការិយាល័យអន្តរាគមន៍ពិសេស (រងរបួសធ្ងន់ត្រង់ក្បាល) លោកព្រិន្ទបាលទោ ហុង សង្វាត មន្ត្រីនៃការិយាល័យអន្តរាមន៍ ( រងរបួសស្រាល ) ដែលបង្កដោយបុរសម្នាក់ឈ្មោះ ឆាយ គឹមហួង អនុប្រធានការិយាល័យក្រសួងទេសចរណ៍ បើកបរក្នុងស្ថានភាពស្រវឹងខ្លាំង (មានកំរិតជាតិអាកុល ០.៧៨mmខ្យល់ ) មកបុកកម្លាំងចម្រុះនៅវេលាម៉ោង២២និង៥០នាទីយប់ ស្របពេលដែលលោកស្នងការរងកំពុងដឹកនាំកម្លាំងប្រជុំជួរ ដើម្បីអនុវត្តរឹតបន្តឹងច្បាប់ចរាចរណ៍ផ្លូវគោក នៅតាមបណ្តោយមហាវិថីព្រះមុនីវង្ស មុខវត្តកោះ ខណ្ឌដូនពេញ។
ចំណែកនៅយប់ ថ្ងៃទី៣ ដែលជាថ្ងៃទី១២ ខែមីនា ឆ្នាំ២០២០កម្លាំងចម្រុះបានអនុវត្តរឹតបន្តឹងច្បាប់ចរាចរណ៍ផ្លូវគោកដោយ ឃាត់បានរថយន្ត ១៣ គ្រឿង និង ឃាត់បានម៉ូតូ ២៥៥ គ្រឿង សរុបឃាត់បានរថយន្ត និងម៉ូតូ ចំនួន ២៦៨ គ្រឿង ហើយអ្នកបើកបររថយន្តក្នុងស្ថានភាពស្រវឹងមានចំនួន ១៣ នាក់ និងអ្នកបើកបរម៉ូតូក្នុងស្ថានភាពស្រវឹងមានចំនួន ៣១ នាក់, អ្នកបើកបរអត់ពាក់មួកសុវត្ថិភាព និងអត់កញ្ចក់ចំនួន ២៣៣ នាក់ ។ ក្នុងនោះក៏មានករណីគ្រឿងញៀនចំនួន ១០ នាក់ផងដែរ ។ គួរបញ្ជាក់ដែរថា ការចុះអនុវត្តរឹតបន្តឹងច្បាប់ចរាចរណ៍ផ្លូវគោក នៅក្នុងរាជធានីភ្នំពេញអនុវត្តទៅលើអ្នកបើកបរក្រោមឥទ្ធិពលគ្រឿងស្រវឹង និង អ្នកបើកល្បឿនលឿននៅពេលយប់។ អត្រាគ្រោះថ្នាក់ចរាណ៍នៅពេលយប់បានកើនឡើងគួរឱ្យព្រួយបារម្ភ ផ្តើមចេញពីអ្នកបើកបរស្រវឹងស្រា ៕ ដោយ ៖ អ. ខេន ពេជ្រ ប្រភព៖ អគ្គស្នងការដ្ឋាននគរបាលជាតិ
