ឃាត់ខ្លួនអ្នកលក់ឧបករណ៍ធ្វើតេស្តរកវីរុសកូវីដ១៩ ដោយខុសច្បាប់ម្នាក់ តាមអនឡាញ
- March 30, 2020
រាជធានីភ្នំពេញ៖ ដោយទទួលបានបទបញ្ជាពី ឯកឧត្តម ជា ពិសី ប្រធានគណៈបញ្ជាការឯកភាពខណ្ឌ និងជាអភិបាលខណ្ឌប្ញស្សីកែវ ថ្ងៃអាទិត្យ ០៦ កើត ខែចេត្រ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៩ ខែមីនា ឆ្នាំ២០២០ វេលាម៉ោង ១៨ និង ០០ នាទី កម្លាំងសមត្ថកិច្ចបានចុះទៅដល់ទីតាំងមួយកន្លែង ដែលជាប់ពាក់ព័ន្ធនឹងការបង្ហោះលក់ឧបករណ៍ធ្វើតេស្តរកវីរុស Covid-19 នៅចំណុចផ្ទះជួលលេខ៥ ក្រុមទី៦ ភូមិបឹងឈូក សង្កាត់ គ.ម ៦ ខណ្ឌប្ញស្សីកែវ រាជធានីភ្នំពេញ ដោយមានឈ្មោះ វ៉ា វួចគៀង ភេទស្រី អាយុ ២៦ ឆ្នាំ មុខរបរលក់ឥវ៉ាន់តាមប្រព័ន្ធអនឡាញ ជាម្ចាស់ផ្ទះជួល។ ឈ្មោះ វ៉ា វួចគៀង បាន ប្រើប្រាស់ page facebook មានឈ្មោះ Rama Brand Shop បង្ហោះផ្សព្វផ្សាយលក់ឧបករណ៍ធ្វើតេស្តរកវីរុស Covid-19 ដោយគ្មានច្បាប់អនុញ្ញាតពីក្រសួងសុខាភិបាល។
ជាលទ្ធផល គណៈបញ្ជាការឯកភាពខណ្ឌ រកឃើញថា ឈ្មោះ វ៉ា វួចគៀង បានរៀបរាប់ថា ខ្លួនគ្រាន់តែជួយបង្ហោះផ្សព្វផ្សាយពាណិជ្ជកម្មដើម្បីលក់ឧបករណ៍ខាងលើនេះ អោយឈ្មោះ ម៉ូនីតា សុខ ប៉ុណ្ណោះ ដែលកំពុងរស់នៅសហរដ្ឋអាមេរិក តែប្រសិនបើ មានអ្នកកម្មង់ទិញ ខ្លួននឹង chat ទៅ Facebook មានឈ្មោះ Monita Sok ដើម្បីទទួលឥវ៉ាន់យកមកលក់បន្ត។ ប៉ុន្តែជាក់ស្ដែង ឈ្មោះ វ៉ា វួចគៀងនេះ ពុំទាន់ទទួលបានឧបករណ៍នោះនៅឡើយទេ។
បច្ចុប្បន្ននេះ អធិការដ្ឋាននគរបាលខណ្ឌ បាននាំខ្លួន អ្នកលក់តាមប្រព័ន្ធអនឡាញរូបនេះ ទៅកាន់អធិការដ្ឋាន ដើម្បីសួរនាំបន្តទៀត និងកសាងសំណុំរឿងតាមនីតិវិធី៕
ប្រភព៖ អភិបាលនៃគណៈអភិបាលខណ្ឌប្ញស្សីកែវ
- Share This Post: