មុនទិញរថយន្ត Prius អ្នកគួរដឹងថាវាឧស្សាហ៍ខូចអីខ្លះ ជៀសវាងសម្រេចចិត្តខុស

រថយន្តដែលកំពុងពេញនិយម និងឆក់យកបេះដូងអ្នកប្រើប្រាស់មួយចំនួនធំ គឺរថយន្ត Toyota Prius ក៏ព្រោះតែវាជាប្រភេទរថយន្តដែលស៊ីសាំងតិចបំផុត សម្រាប់ប្រើប្រាស់ជាលក្ខណៈគ្រួសារ ជាពិសេសអ្នកដែលជិះឡានច្រើនក្នុងមួយថ្ងៃៗ។ ថ្វីត្បិតថារថយន្ត Toyota Prius ជាច្រើនរថយន្តដែលស៊ីសាំងតិចក៏ពិតមែន ហើយក៏មានមនុស្សមិនតិចដែរ កំពុងតែមានគោលបំណងចង់ទិញវាយកមកប្រើប្រាស់។

ថ្ងៃនេះដែរក្រុមការងារយើងបានចុះផ្ទាល់ ដើម្បីសាកសួរពីម្ចាស់យាន្តដ្ឋានជួសជុលរថយន្ត M Car Part & Services ដែលមានបទពិសោធន៍ទាក់ទងនឹងរថយន្ត Prius ក្នុងគោលបំណងចែករំលែកជូនដល់ប្រជាពលរដ្ឋយើង ដែលកំពុងតែមានបំណងទិញរថយន្តប្រភេទនេះមកប្រើប្រាស់។ លោក អ៊ឹម សុខសរ បានប្រាប់អោយដឹងថា មុននឹងសម្រេចចិត្តទិញរថយន្ត Prius អ្នកត្រូវត្រៀមលក្ខណៈថា ថ្ងៃណាមួយវានឹងមានបញ្ហាខូចខាតគ្រឿងបន្លាស់ មួយចំនួន ដោយសារតែរថយន្តមួយនេះប្រើប្រាស់ ប្រពន្ធ័ Hybrid Systerm។ បញ្ហាដែលយាន្តដ្ឋានជួសជុល M Car Part & Services បានជួបប្រទះនោះមានដូចជា៖

1. បញ្ហាខូចដុំ ABS : ដោយសារតែរថយន្ត Prius ប្រើប្រាស់ប្រពន្ធ័ Hybrid Systerm ទើបប្រពន្ធ័ហ្វ្រាំង ABS ជាប្រភេទ ABS ភ្លើង ហើយវាងាយខូចជាង ABS ធម្មតា ដោយវាមានអាយុកាលប្រើប្រាស់របស់វា ដូចនេះអ្នកដែលទិញប៉ះឡាន Mile ច្រើន គេប្រើប្រាស់ច្រើនពីមុននោះ វាមានភាគរយខ្ពស់ក្នុងការខូចដុំ ABS នេះណាស់។

2. បញ្ហាអាគុយ Hybrid : វាជារឿងសាមញ្ញហើយ ដែលរថយន្ត Prius តែងតែខូចអាគុយ Hybrid ព្រោះអាគុយមួយនេះ វាធ្វើការរហូតពេលយើងធ្វើដំណើរ វាបានបញ្ចេញថាមពល និង បញ្ចូលថាមពលភ្លាមៗ ទៅវិញទៅមកជានិច្ច ដូចនេះហើយ ពេលដែលដល់អាយុកាលរបស់វា វានឹងខូច។

3. ម៉ូទ័របូមទឹក: រថយន្ត Hybrid ទាំងគឺសុទ្ធតែមានម៉ូទ័រ បូមទឹកដើម្បីស្អំ Inverter របស់វាក៏ដូចជាស្អំអាគុយ កុំអោយឡើងកំដៅខ្លាំង ហើយម៉ូទ័របូមទឹកនេះ វាមាន២ប្រភេទផងដែរ គឺទុយយោ៣ និង ទុយយោ២។ កាលណាវាខូចម៉ូទ័របូមទឹក ម៉ាស៊ីនត្រជាក់នឹងលែងដំណើរការ ហើយបើខូចម៉ូទ័របូមទឹកទុយយោ២ វានឹងធ្វើអោយរថយន្តរលត់ថែមទៀតផង។

4. បញ្ហាម៉ាស៊ីនត្រជាក់: រថយន្ត Prius ក៏ឧស្សាហ៍កើតមានបញ្ហាម៉ាស៊ីនត្រជាក់ផងដែរ ព្រោះម៉ាស៊ីនត្រជាក់របស់វាប្រើប្រាស់ថាមពលអគ្គីសនី ពីអាគុយ Hybrid។

ទោះជាយ៉ាងណាក្តី បញ្ហាទាំងអស់កើតមានអាស្រ័យលើ កាប្រើប្រាស់របស់អ្នក ដូចជាពេលខ្លះរថយន្ត Prius មួយទឹកពីស្រុកគេ ប្រើប្រាស់ច្រើនស្រាប់ ដូច្នេះពេលយើងទិញប៉ះចំ រថយន្តបែបនេះ វានឹងឧស្សាហ៍ធ្វើទុក្ខហើយ ប៉ុន្តែវាក៏អាចមានករណីចៃដន្ត ផងដែរចំពោះរថយន្តប្រើប្រាស់តិចក៏អាចមានបញ្ហានេះដូចគ្នា។ ប៉ុន្តែអ្នកដែលប្រើប្រាស់រថយន្ត Prius គឺវាសន្សំសំចៃប្រេងសាំងបានច្រើន មែនទែនសម្រាប់អ្នកដែលជិះរថយន្តច្រើន ក្នុងមួយថ្ងៃៗ៕

អត្ថបទ៖ សុវណ្ណ