សាំងហ្គាពួររកឃើញអ្នកឆ្លងវីរុសកូវីដ១៩ ថ្មីចំនួន ១,០៣៧នាក់ ដែលនាំឱ្យករណីសរុបកើនដល់ ១១,១៧៨នាក់

សាំងហ្គាពួរ៖ តាមការចុះផ្សាយរបស់ Asia One បានឱ្យដឹងថា ក្រសួងសុខាភិបាល (MOH) បានបញ្ជាក់ជាបឋមនូវករណីឆ្លងវីរុស COVID-19 ថ្មីចំនួន ១,០៣៧ ករណី នៅក្នុងប្រទេសសិង្ហបុរី សម្រាប់ថ្ងៃព្រហស្បតិ៍ ទី២៣ ខែមេសា ឆ្នាំ២០២០។ ករណីភាគច្រើនគឺជាពលករបរទេស ដែលស្នាក់នៅក្នុងអន្តេវាសិកដ្ឋាន (បណ្ដុំបន្ទប់ជួល) ហើយ ២១នាក់ ក្នុងចំណោមអ្នកឆ្លងថ្មី គឺជាជនជាតិសិង្ហបុរី និងជាអ្នកស្នាក់នៅអចិន្ត្រៃយ៍។

តួលេខនេះនាំឱ្យមានករណីសរុបនៅសាំងហ្គាពួរកើនដល់ ១១,១៧៨ករណី ហើយរហូតដល់ពេលនេះមានអ្នកជំងឺចំនួន ៨៩៦នាក់ បានជាសះស្បើយនិងរំសាយចេញពីពេទ្យ ខណៈមានអ្នកស្លាប់ចំនួន ១២នាក់។ ក្រសួងមហាផ្ទៃកំពុងធ្វើការលម្អិតអំពីករណីទាំងនេះ ហើយចែករំលែកព័ត៌មានថ្មីៗបន្ថែមទៀតនៅយប់នេះ៕

អត្ថបទ៖ លីដា
ប្រភព៖ Asiaone