ក្លឹបបាល់ទាត់វិសាខា បញ្ជាក់ថា កីឡាករ ទៀត គឹមហេង មានដុំឈាមតូចមួយនៅចន្លោះលលាដ៍ និងខួរក្បាល និងប៉ះទង្គិចបញ្ហាផ្លូវចិត្ត ដោយសារបាត់បង់មនុស្សជាទីស្រលាញ់ ក្រោយជួបគ្រោះថ្នាក់ចរាចរណ៍
រាជធានីភ្នំពេញ៖ កាលពីវេលាម៉ោង០១រំលងអាធ្រាត្រឈានចូលថ្ងៃសៅរ៍ ទី២៧ ខែមិថុនា ឆ្នាំ២០២០ មានករណីគ្រោះថ្នាក់ចរាចរណ៍មួយបង្កឡើងដោយរថយន្តមួយគ្រឿង (មិនចាំម៉ាក) បានបោះពួយយ៉ាងលឿនបុកម៉ូតូមួយគ្រឿងពេញទំហឹង និងអូសទាំងម៉ូតូទាំងមនុស្សជាង៣០ម៉ែត្រ ហើយរត់គេចខ្លួនបាត់ស្រមោល។ ជនរងគ្រោះនៅក្នុងហេតុការណ៍គ្រោះថ្នាក់ចរាចរណ៍នោះមាននារីរូបស្រស់ម្នាក់ឈ្មោះ គ្រី សុខដាលែន ហៅជ្រុយ អាយុ១៨ឆ្នាំ ជាសិស្សសាលាវិទ្យាល័យទួលទំពូង បានបោកក្បាលនឹងថ្នល់ស្លាប់ភ្លាមៗនៅក្នុងថ្លុកឈាម និងបុរសម្នាក់ទៀតឈ្មោះ ទៀត គឹមហេង ជាអតីតកីឡាករបាល់ទាត់ជម្រើសជាតិ U16 បានរងរបួសធ្ងន់ត្រូវបានបញ្ចូនទៅកាន់មន្ទីរពេទ្យ។
ជុំវិញករណីហេតុការណ៍គ្រោះថ្នាក់ចរាចរណ៍ដ៏រន្ធត់នេះ ក្លឹបបាល់ទាត់វិសាខា ក៏បានធ្វើការបង្ហោះនៅលើបណ្តាញសង្គមហ្វេសប៊ុកថា “🙏 ជូនពរកីឡាករ ទៀត គីមហេង ឆាប់ជាសះស្បើយ 🙏 គ្រួសារកីឡាបាល់ទាត់វិសាខា ពិតជាមានការសោកស្ដាយជាខ្លាំង ចំពោះហេតុការណ៍គ្រោះថ្នាក់ចរាចរណ៍ដ៏អាក្រក់ កាលពីយប់រំលងអាធ្រាតឈានចូលថ្ងៃទី២៧ ខែមិថុនា ឆ្នាំ២០២០ ដែលបង្កដោយរថយន្ដទំនើប មិនស្គាល់អត្តសញ្ញាណមួយគ្រឿង បានបើកក្នុងល្បឿនលឿន ហើយបុកម៉ូតូម៉ាក PCX ដែលជិះគ្នា ២នាក់ ដោយកីឡាករ ទៀត គឹមហេង (រងរបួសធ្ងន់) និងមិត្តស្រី (បណ្ដាឲ្យស្លាប់បង់ជីវិតភ្លាមៗ នៅកន្លែងកើតហេតុ) ។
បន្ទាប់ពីកើតហេតុ ទៀត គឹមហេង ត្រូវបានបញ្ជូនទៅសង្គ្រោះនៅមន្ទីរពេទ្យ ដែលមកទល់ពេលនេះ ក្រុមគ្រូពេទ្យកំពុងតាមដានស្ថានភាពគេនៅឡើយ ។ វេជ្ជបណ្ឌិត បានបញ្ជាក់ថា ក្រោយធ្វើការស្កេនជំហានដំបូង គឹមហេង មានដុំឈាមតូចមួយ នៅចន្លោះលលាដ៍ និងខួរក្បាល ដែលត្រូវធ្វើការតាមដាន ៤៨ម៉ោង ប្រសិនបើឈាមនោះ មិនរីកទេ មានន័យថា ស្ថានភាពល្អប្រសើរ មិនចាំបាច់ព្យាបាលតាមការវះកាត់ឡើយ តែបើឈាមកកនោះ រីកធំឡើងក្រុមគ្រូពេទ្យ នឹងពិនិត្យលើស្ថានភាពជាក់ស្ដែង ហើយភាគរយច្រើនអាចប្រើវិធីព្យាបាលដោយវះកាត់ ។ ពាក់ព័ន្ធស្មារតីវិញ គឺមានស្ថានភាពធម្មតា គ្រាន់តែប៉ះទង្គិចបញ្ហាផ្លូវចិត្ត ដោយសារការបាត់បង់មនុស្សជាទីស្រលាញ់ ។ យើងទាំងអស់គ្នា សូមផ្ដល់កម្លាំងចិត្ត និងជូនពរ គឹមហេង ឆាប់ជាសះស្បើយឆាប់ៗ ។
ក្នុងឱកាសនេះដែរ តាងនាមគ្រួសារបាល់ទាត់វិសាខា សូមអំពាវនាវឲ្យសមត្ថកិច្ច ជួយស្វែងរកអត្តសញ្ញាណរថយន្ដ និងជនបង្ក ដើម្បីចាត់វិធានការតាមផ្លូវច្បាប់ ។ បន្ថែមលើនេះ ក្លិបកីឡាបាល់ទាត់ វិសាខា ក៏សូមចូលរួមរំលែកទុក្ខដ៏ក្រៀមក្រំបំផុត ជាមួយគ្រួសារមិត្តស្រីរបស់កីឡាករ ទៀត គឹមហេង ដែលបានបាត់បង់កូនជាទីស្រលាញ់ស្មើជីវិតផងដែរ”៕
