សួស្តីអ្នកទាំងអស់គ្នា ថ្ងៃនេះដែរយើងមានរូបមន្ត វិធីធ្វើស្តេកសាច់ទ្រូងមាន់មកផ្ញើសម្រាប់បងប្អូនដែលនិយមចូលចិត្តទទួលទានស្តេកប៉ុន្តែខ្លាចធាត់បងប្អូនអាចសាកយករូបមន្តនេះមកធ្វើបាន ទាំងឆ្ងាញ់ហើយថែមទាំងមិនធាត់ទៀតផង តោះយើងមកមើលគ្រឿងផ្សំនិងវិធីធ្វើទាំងអស់គ្នា

*គ្រឿងផ្សំ

1. សាច់ទ្រូងមាន់ ២៦០ក្រាម
2. អំបិល 1/2 ស្លាបព្រាកាហ្វេ
3. ម្រេច 1/2 ស្លាបព្រាកាហ្វេ
4. ប្រេងអូលីវ 1/2 ស្លាបព្រាកាហ្វេ

*គ្រឿងផ្សំសាល់សាសាឡាត់

1. ស្វាយទុំ ១ផ្លែ
2. ប៉េងប៉ោះហាន់តូចៗល្មម ១ស្លាបព្រាបាយ
3. ខ្ទឹមក្រហមចិញ្រ្ចាំល្អិត ១ស្លាបព្រាបាយ
4. ជីវ៉ាន់សុយហាន់ល្អិត ១ស្លាបព្រាបាយ
5. ទឹកក្រូចឆ្មា ២ស្លាបព្រាកាហ្វេ
6. ស្លឹកខ្ទឹមហាន់ល្អិត ១ស្លាបព្រាបាយ
7. ប្រេងល្ង 1/2 ស្លាបព្រាកាហ្វេ
8. ទឹកម្ទេស 1/2 ស្លាបព្រាកាហ្វេ

*វិធីធ្វើ

• ជាដំបូងយើងលាងទ្រូងមាន់អោយស្អាត រួចយកទៅអុាំងនៅខ្ទះសម្រាប់អុាំង រោយពីលើដោយប្រេងអូលីវ អំបិល ម្រេច បន្តការសុាំងសាច់ទ្រូងមាន់យើងអោយឆ្អិនល្អ​រួចដួសឡើងទុកមួយអន្លើរ
• ក្រោយមកយើងងាកមកធ្វើ សាលសាសាឡាត់ទាំងអស់គ្នា ដោយយើងយក ស្វាយទុំហាន់ល្អិតៗ តាមដោយប៉េងប៉ោះ ស្លឹកខ្ទឹម ខ្ទឹមក្រហម ជិវ៉ាន់សុយ ទឹកម្ទេស ផ្សំរសជាតិដោយក្រូចឆ្មា លាយអោយចូលគ្នាល្អ
• ក្រោយមកយើងយកសាលសាសាឡាត់ស្រោយពីលើសាច់មាន់អុាំងរបស់យើងជាការស្រេច។