សាំងហ្គាពួរមានករណី COVID-19 ថ្មីចំនួន ១៨៨ ដែលត្រូវបានបញ្ជាក់ នៅថ្ងៃព្រហស្បត្តិ៍ ទី០២ ខែកក្កដា ដែលនាំឱ្យចំនួនសរុបមានរហូតដល់ ៤៤,៣១០ ករណី និងការស្លាប់មាន ២៦នាក់ដដែល។ ក្រសួងសុខាភិបាលបាននិយាយថា ករណីទាំងនោះរួមមានករណីក្នុងសហគមន៍ចំនួន ១០ និងករណីនាំចូល ១ ហើយក្រៅពីនោះគឺសុទ្ធតែជាពលករចំណាកស្រុក ដែលរស់នៅក្នុងអន្តេវាសិកដ្ឋាន។

ដោយមានអ្នកជំងឺចំនួន ៥១១ ត្រូវបានរំសាយកាលពីថ្ងៃពុធ ដូច្នេះសាំងហ្គាពួរមានអ្នកជំងឺ ៣៨,៩៩៩នាក់ ដែលបានជាសះស្បើយពីជំងឺនេះ។ គិតមកដល់ពេលនេះមានអ្នកជំងឺ ២០៩នាក់ កំពុងសម្រាកព្យាបាលនៅមន្ទីរពេទ្យ រីឯ ៤,៨៧៦នាក់ កំពុងសម្រាកព្យាបាលនៅតាមមូលដ្ឋានសហគមន៍។ នៅទូទាំងពិភពលោកមានករណីសរុបជាង ១០.៧ លាននាក់ ខណៈមានមនុស្ស ៥១៨,០០០ បានស្លាប់ ហើយសហរដ្ឋអាមេរិកនៅតែឈរលើគេទាំងការស្លាប់ និងចំនួនឆ្លង៕

អត្ថបទ៖ លីដា
ប្រភព៖ Channel News Asia