យោងតាមបទសម្ភាសន៍ជាមួយនាយកក្រុមហ៊ុន Ford Global លោក Dave Pericak ជាមួយនឹងសារព័ត៌មាន Yahoo Finance ដែលត្រូវបានផ្សព្វផ្សាយនៅលើបណ្ដាញ Twitter បានឱ្យដឹងថា Ford នឹងនាំយកមកវិញនូវម៉ូដែល Bronco ដែលជារថយន្ត SUV ដ៏ល្បីល្បាញបំផុតមួយកាលពីជំនាន់ឆ្នាំ១៩៦០ ហើយវាត្រូវបានគេឱ្យនាមថាជា G.O.A.T. ឬ Goes Over Any Terrain (ទៅបានគ្រប់ស្ថានភាពភូមិសាស្ដ្រ) នៅអំឡុងជំនាន់នោះ មុនពេលដែល Ford បានឈប់ផលិតម៉ូដែលនេះនៅឆ្នាំ១៩៩៦។

ឥឡូវនេះក្រុមហ៊ុន Ford បានសម្រេចនាំយកនូវម៉ូដែល icon នេះឡើងមកវិញ ហើយវាត្រូវបង្ហាញវត្តមាននៅថ្ងៃទី១៣ ខែកក្កដា ឆ្នាំ២០២០ នេះផ្ទាល់តែម្ដង។ កាលពីមុនក៏ធ្លាប់មានពាក្យចចាមអារាមថា Ford នឹងផលិតវាឡើងវិញដែរ ក៏ប៉ុន្តែគ្មានការគាំទ្រការអះអាងទាំងនោះទេ។ ទើបតែពេលនេះគឺវាបានបញ្ជាក់យ៉ាងច្បាស់ពីមាត់នាយកក្រុមហ៊ុន Ford Global លោក Dave Pericak ។ យ៉ាងណាក៏ដោយវានៅមិនទាន់មានការរៀបរាប់ពីគ្រឿងម៉ាស៊ីន ឬមុខងារណាមួយនៅឡើយទេ ប៉ុន្តែលោក Dave Pericak និយាយថា វានឹងល្អជាងរថយន្ត Jeep Wrangler ដោយសារតែវាទំនើបជាង និងឆ្លាតវៃជាង។

យើងនឹងដឹងកាន់តែច្បាស់អំពីត្រកូល Bronco ឆាប់ៗនេះ! ដូចដែលយើងបានលើកឡើងហើយថារថយន្ត Ford Bronco ជំនាន់ចុងក្រោយនឹងធ្វើការបង្ហាញខ្លួនជាសកលនៅថ្ងៃទី១៣ ខែកក្កដា ឆ្នាំ២០២០ ដែលអ្នកអាចមើលបានតាមរយៈការផ្សាយផ្ទាល់លើអ៉ីធឺណេត៕

អត្ថបទ៖ លីដា
ប្រភព៖ Motor1