ក្រុមហ៊ុន BMW ទើបតែបញ្ចេញរថយន្ត SUV អគ្គិសនីដំបូងបំផុតរបស់ខ្លួនគឺ iX3 ស៊េរីឆ្នាំ2021 ដែលអាចជិះបានចម្ងាយ 460គីឡូម៉ែត្រ

ក្រុមហ៊ុនផលិតរថយន្តប្រណីត BMW ទើបតែបានប្រកាសពីវត្តមានរថយន្ត SUV អគ្គិសនីដំបូងបំផុតរបស់ខ្លួននោះគឺ iX3 បន្ទាប់ពីមានពាក្យចចាមអារាម និងការបែកធ្លាយជាយូរមកហើយ ទាក់ទងពីគ្រោងការរថយន្តអគ្គីសនីរបស់ក្រុមហ៊ុនអាល្លឺម៉ង់មួយនេះ។ រថយន្ត BMW iX3 គឺមានមូលដ្ឋានលើម៉ូដែល X3 ហើយប្រើប្រព័ន្ធ eDrive ជំនាន់ទី៥ បូករួមទាំងអាគុយកម្លាំង 80 គីឡូវ៉ាត់/ម៉ោង និងម៉ូទ័រកម្លាំង 282សេះ ខណៈកម្លាំងបង្វិល 295 ផោន-ហ្វីត (400Nm)។ រថយន្ត BMW iX3 អាចធ្វើដំណើរបានចម្ងាយ 460គីឡូម៉ែត្រ រាល់ពេលសាកថ្មពេញម្ដង ដែលវាយតម្លៃដោយ WLTP របស់សហភាពអឺរ៉ុប។

រថយន្តនេះគឺមានប្រើតែប៉ុង១ប៉ុណ្ណោះ (RWD) ជាមួយសន្ទុះល្បឿនពី 0-100គីឡូម៉ែត្រ ត្រឹមរយៈពេលតែ 6.8វិនាទី ហើយល្បឿនកំពូលរបស់វាគឺ 180គីឡូម៉ែត្រ ព្រោះថាស្ដង់ដារនៃរថយន្តអគ្គិសនីមិនអាចលឿនជាងនេះខ្លាំងនោះទេ។ វាអាចប្រើឌុយសាក fast-charging (150kW) បានផងដែរ ដូច្នេះវាអាចសាកថ្មបានពី 0-80% ប្រើរយៈពេលតែ ៣៤នាទី។ ប្រសិនបើម្ចាស់រថយន្ត BMW iX3 ស៊េរីឆ្នាំ2021 សាកអាគុយដោយប្រើឌុយសាកល្បឿនលឿននេះរយៈពេល ១០នាទី ពួកគេក៏អាចជិះវាបានរហូតដល់ទៅ 100គីឡូម៉ែត្រ ផងដែរ។

រថយន្ត BMW iX3 ស៊េរីថ្មីនឹងក្លាយជាម៉ូដែលអគ្គីសនីដំបូងបង្អស់ក្នុងចំណោមរថយន្តអគ្គីសនីចំនួន ៣ ម៉ូដែល ដែលក្រុមហ៊ុនផលិតរថយន្តអាល្លឺម៉ង់មាននៅក្នុងឃ្លាំងសម្រាប់បម្រើអតិថិជន។ ម៉ូដែល ២ ផ្សេងទៀតគឺ i4 និង iNext SUV ដែលគ្រោងចេញលក់នៅឆ្នាំ2021។ រថយន្ត BMW iX3 ស៊េរីថ្មីនឹងមានលក់នៅចុងឆ្នាំនេះក្នុងប្រទេសចិន ហើយអឺរ៉ុបនឹងចេញលក់នៅឆ្នាំ2021។ រថយន្ត BMW iX3 នឹងមិនមាននៅទីផ្សារអាមេរិក​ខាង​ជើងនោះទេ ដូច្នេះមានតែត្រូវរង់ចាំ i4 និង iNext SUV ដែលចេញក្រោយៗពីនេះ៕

អត្ថបទ៖ លីដា
ប្រភព៖ Carscoops