រថយន្ដ Toyota Camry ស៊េរីឆ្នាំ2021 បង្ហាញខ្លួនហើយ រូបរាងកាន់តែអ៊ែមជាងមុន

រថយន្ដ Toyota Camry ស៊េរីឆ្នាំ2021 បានបង្ហាញខ្លួនជាផ្លូវការហើយ ជាមួយនឹងការធ្វើបច្ចុប្បន្នភាពថ្មីៗជាច្រើន។ ការផ្លាស់ប្តូរគួរឱ្យកត់សម្គាល់ចំពោះត្រកូលមួយនេះ គឺមុខងារ Toyota Safety Sense, មុខមាត់ថ្មីសម្រាប់ XSE Hybrid និងជម្រើសជាច្រើនទៀត ដែលត្រូវបានរចនាឡើងដើម្បីរក្សាឈ្មោះជារថយន្តលក់ដាច់បំផុតរបស់ខ្លួន។ ម៉ូដែល Camry មានអាយុកាលជិត ៤០ឆ្នាំហើយ ហើយជំនាន់ថ្មី XV70 បច្ចុប្បន្នគឺទើបតែមានពីឆ្នាំ២០១៧នេះទេ។

និយាយដល់មុខងារ Toyota Safety Sense 2.5 វាគឺជាការផ្លាស់ប្តូរធំបំផុតមួយ ដែលនឹងមានបំពាក់លើគ្រប់កម្រិត (grades) របស់រថយន្ត Camry ស៊េរីឆ្នាំ2021 ហើយក៏មានការធ្វើឱ្យប្រសើរឡើងពីជំនាន់ 2.0 ជាមួយនឹងកាម៉េរាមានគុណភាពខ្ពស់, ប្រព័ន្ធរ៉ាដាជួយដល់ការពង្រីក, ឆ្លើយតបនៅក្នុងស្ថានភាពងងឹតល្អជាងមុន, មុខងារ pre-collision intersection support (ជំនួយបន្ទាប់បន្សំក្នុងពេលយានយន្តអាចនឹងមានគ្រោះថ្នាក់), ជំនួយដៃចង្កូត, បន្ថយល្បឿនដោយស្វ័យប្រវត្តិតាមល្បឿនរថយន្តខាងមុខ (Adaptive Cruise Control) និងជំនួយក្នុងការប្ដូរគន្លងផងដែរ។

Toyota និយាយថាមុខងារ Safety Sense 2.5 មានតែលើ Camry ស៊េរីឆ្នាំ2021 នេះប៉ុណ្ណោះ ប៉ុន្តែនឹងមានលើគ្រប់ម៉ាករបស់ Toyota នាពេលអនាគត។ រថយន្ត​ Camry ស៊េរីឆ្នាំ2021 នឹងមានរូបរាងប្រហាក់ប្រហែលគ្នាផងដែរ ដោយគ្រប់កម្រិតនឹងមានប៉ាណាមុខថ្មីកែប្រែថ្មីទាំងអស់ ប៉ុន្តែគួរឱ្យស្ដាយដោយប្រភេទ L ដែលជាកម្រិតធូរថ្លៃជាងគេនឹងលែងមានទៀតហើយ ដោយជំនួសមកវិញជាមួយប្រភេទ LE ។ រថយន្ត Camry XSE Hyrbid នៅតែបំពាក់ម៉ាស៊ីនចំណុះ 2.5លីត្រ 4ស៉ីឡាំង ជាមួយនឹងកម្លាំង 208សេះ នឹងកម្លាំងបង្វិល 163 ផោន-ហ្វីត (221Nm)។

សម្រាប់រថយន្ត Carmy ដើរដោយថាមពលហ្គាស់នៅតែមានជម្រើស ២ដដែល ដោយមានមួយជា ម៉ាស៊ីនចំណុះ 2.5 កម្លាំង 203សេះ និងកម្លាំងបង្វិល 184 ផោន-ហ្វីត (250nm) និងមួយទៀតជាម៉ាស៊ីន V6 ទំហំ 3.5 មានកម្លាំង 301សេះ និងកម្លាំងបង្វិល 267 ផោន-ហ្វីត (362nm) ។ នៅមានមុខងារ និងការកែប្រែជាច្រើនទៀតសម្រាប់ រថយន្ត​ Camry ស៊េរីឆ្នាំ2021 ក៏ប៉ុន្តែចំពោះតម្លៃគឺនៅមិនទាន់មានការបញ្ជាក់នៅឡើយទេ ហើយក៏មានជម្រើសថ្នាក់រហូតដល់ទៅ ១៧កម្រិត សម្រាប់ឆ្នាំ2021នេះ៕

អត្ថបទ៖ លីដា
ប្រភព៖ Motor1