ស្នងការដ្ឋាននគរបាលរាជធានីភ្នំពេញ ចេញមុខបកស្រាយករណីសមត្ថកិច្ច តាមចាប់ជនសង្ស័យលួចម៉ូតូ
ភ្នំពេញ ៖ កាលពីថ្ងៃទី២៧ ខែកក្កដា ឆ្នាំ២០២០ វេលាម៉ោងប្រហែល ១២:៣០នាទី កម្លាំងការិយាល័យព្រហ្មទណ្ឌកម្រិតស្រាល បានស្រាវជ្រាវនិងធ្វើការឃាត់ខ្លួនជនសង្ស័យម្នាក់ឈ្មោះ ទៀង តុល ហៅកង្កែប អាយុ៤៥ឆ្នាំ នៅចំណុចផ្លូវលេខ៩០ សង្កាត់ស្រះចក ខណ្ឌដូនពេញ ក្នុងបទល្មើសលួចម៉ូតូម៉ាកហុងដាC១២៥ ស៊េរីឆ្នាំ២០២០ ពណ៌ខ្មៅ ពាក់ស្លាកលេខភ្នំពេញ1IF-5189 នៅចំណុចមុខផ្ទះលេខ៥៤ ផ្លូវលេខ១៨៤ សង្កាត់បឹងរាំង ខណ្ឌដូនពេញ កាលពីថ្ងៃទី០៩ ខែកក្កដា ឆ្នាំ២០២០។
ក្រោយពីទទួលចម្លើយសារភាពរបស់ជនសង្ស័យខាងលើសមត្ថកិច្ចក៏បានបន្តទៅធ្វើការឃាត់ខ្លួនជនសង្ស័យម្នាក់ទៀតដែលជាបក្សពួកមានឈ្មោះ រស់ ទិត្យ ហៅម៉ៅ អាយុ៤៧ឆ្នាំនៅចំណុចផ្លូវរថភ្លើងលេខ២៧៣ សង្កាត់ស្រះចក ខណ្ឌដូនពេញ រាជធានីភ្នំពេញ និងបានចាប់យកវត្ថុតាងម៉ូតូ ដែលជិះធ្វើសកម្មភាពម៉ាកហុងដា C125 ស៊េរីឆ្នាំ២០២០ ពាក់ស្លាកលេខភ្នំពេញ1IF-1909 បញ្ជូនមកការិយាល័យដើម្បីបំពេញនីតិវិធីចាត់ការបន្តតាមច្បាប់។
បន្ទាប់ពីធ្វើការឃាត់ខ្លួនមកសាកសួរជនសង្ស័យទាំងពីរខាងលើបានសារភាពថា ពួកគេពិតជាបានធ្វើសកម្មភាពលួចម៉ូតូខាងលើពិតប្រាកដមែន៕
ប្រភព៖ អគ្គស្នងការដ្ឋាននគរបាលជាតិ