កាលពីឆ្នាំមុនលោក Jonny Lieberman ដែលជានាយករបស់ទស្សនាវដ្តីរថយន្ត Motor Trend ធ្លាប់បានប្រាប់ថា ក្រុមហ៊ុន Toyota គ្រោងនឹងឈប់ផលិតរថយន្ត Land Cruiser តទៅទៀតហើយនៅឆ្នាំ២០២២ ហើយតាំងពីនោះមកយើងក៏មិនច្បាស់ពីជោគវាសនារបស់ម៉ូដែលនេះដែរ។ ប៉ុន្តែយ៉ាងណាក្រុមហ៊ុន Toyota នៅតែប្រកាសដំណឹងល្អខ្លះៗ សម្រាប់ប្រិយមិត្តអ្នកចូលចិត្តរថយន្តនេះតាំងតែពីដើមមក ដោយយ៉ាងហោចណាស់វានៅសល់ពេលមួយឆ្នាំទៀត ទម្រាំតែម៉ូដែលចាស់វស្សាមួយនេះនឹងឈប់ផលិត។

ក្រុមហ៊ុន Toyota បានបង្ហាញជាផ្លូវការនូវរថយន្ត Land Cruiser Heritage Edition ស៊េរីថ្មីឆ្នាំ2021 ហើយវាក៏មើលទៅមិនខុសប្លែកពីម៉ូដែលចាស់ប៉ុន្មានដែរ ប៉ុន្តែវាបានផ្ដល់នូវជម្រើសកៅអី 3ជួរ និងការបន្ថែមពណ៌ឱ្យជ្រើសរើសចំនួន 2 បន្ថែមទៀត ដែលមានដូចជា៖ ទឹកប្រាក់រលោង កណ្ដុរប្រម៉េះ ខ្មៅរលោង និងពណ៌ស។ គ្រប់ Heritage Edition ស៊េរីថ្មី នឹងមានមកជាមួយយ៉ាន់ស្ព័រទំហំ 18 អ៉ីញ ប្លែកពីគ្នា។

ថាមពលសម្រាប់រថយន្ត SUV នេះគឺនៅតែជាម៉ាស៊ីន V-8 ចំណុះ 5.7លីត្រ ដូចគ្នានឹងស៊េរីមុនដែរ ដោយមានកម្លាំង 381 hp និងកម្លាំងបង្វិល 401 lb-ft ។ ប្រព័ន្ធបូម Kinetic Dynamic Suspension (ជំនួយកុំឱ្យរថយន្តរ៉េពេក), Hill-descent control (ជំនួយពេលចុះទួល), Multi-terrain select, Lane-departure warning, Automatic high-beam headlights និងមុខងារសំខាន់ជាច្រើនទៀត នឹងជួយដល់ការធ្វើដំណើររបស់លោកអ្នកទៅបានគ្រប់ទីកន្លែង។

Land Cruiser នៅតែគ្មាន Apple CarPlay និង Android Auto ដែលនេះជាអ្វីដែលវាខ្វះខាត ប៉ុន្តែវាមានប្រព័ន្ធសំឡេង JBL 14-speaker និងបន្ទះសាកឥតខ្សែសម្រាប់ស្មាតហ្វូនរបស់អ្នក។ ចំណែកតម្លៃសម្រាប់ Land Cruiser ធម្មតាគឺចាប់ពី ៨៦,៨៤០ ដុល្លារ ខណៈដែល Heritage Edition មានតម្លៃចាប់ពី ៨៩,១៧០ ដុល្លារ នៅទីផ្សារអាមេរិក៕

អត្ថបទ៖ លីដា
ប្រភព៖ Motor Trend