រថយន្ដ Mazda3 ស៊េរីឆ្នាំ2021 បានបង្ហាញខ្លួនហើយ ដោយលើកនេះគឺដើរដោយម៉ាស៊ីន turbo យ៉ាងថ្មីសន្លាង ហើយក្រុមហ៊ុនក៏បានឱ្យដឹងដែរថា វាមានតម្លៃចាប់ផ្តើមពី 29,900 ដុល្លារ ដោយមិនរាប់បញ្ចូលថ្លៃដឹកទៅគោលដៅ ដែលយ៉ាងហោចណាស់គឺ 945ដុល្លារ បន្ថែមទៀត។ ស៊េរីថ្មីនេះគឺមានតម្លៃថ្លៃជាង Mazda3 ធម្មតាដល់ទៅជិត 10,000ដុល្លារ ប៉ុន្តែយ៉ាងណាវាមានម៉ាស៊ីនល្អជាងមុនឆ្ងាយណាស់ ដោយវាបានបំពាក់ជាមួយម៉ាស៊ីន turbocharged ចំណុះ 2.5លីត្រ ស៊ីឡាំង4 ដែលអាចឱ្យរថយន្តថ្មីនេះមានកម្លាំង 250 hp (186kW/253PS) និងកម្លាំងបង្វិល 320 lb-ft (433Nm)។

ម៉ាស៊ីនរបស់វាគឺស៊ីគ្នាជាមួយប្រអប់លេខអូតូ6វគ្គ ដែលផ្ដល់ថាមពលពេញល្អជាមួយនឹងប្រព័ន្ធប៉ុង2 ខណៈដែលប៉ាណាមុខមានការសម្រួលឱ្យមើលទៅដូចរថយន្តស្ព័រ កញ្ចក់ខ្មៅក្រិប និងយ៉ានស្ព័រទំហំ 18អ៉ីញ ពណ៌ខ្មៅក្រិបដូចគ្នា។ ស៊េរីថ្មីនេះក៏មានចង្រ្កៀងភ្លើងរត់ LED daytime running lights, មានផ្លិតទឹក និងបំពង់ស៊ីមាំងធំជាងមុនផងដែរ។ ចំណែកនៅខាងក្នុងកាប៊ីនវិញ អ្នកបើកនឹងទទួលបាននូវកៅអីស្បែក ដំបូលថ្លា (moonroof) និងប្រព័ន្ធផ្លាស់ប្តូរលេខលើដៃចង្កូត (steering wheel with paddle shifters)។

រថយន្តនេះក៏មានប្រព័ន្ធតំបន់សីតុណ្ហភាព2 dual-zone climate control, chrome accents និងប្រព័ន្ធកម្សាន្ត infotainment ដែលអាចភ្ជាប់បានជាមួយ Android Auto និង Apple CarPlay។ អ្វីដែលគួរឱ្យសម្គាល់ផ្សេងទៀតគឺប្រព័ន្ធ head-up display (HUD), Wi-Fi hot spot, កញ្ចក់មើលក្រោយអូតូ និងប្រព័ន្ធសំឡេង 12-speaker Bose ។

វាក៏មានមុខងារជំនួយបើកបរ (driver assistance) បូករួមទាំងប្រព័ន្ធបើកតាមរថយន្តខាងមុខទាំងឈប់និងទៅ (cruise control with stop and go), ហ្វ្រាំងឆ្លាតវៃ (smart brake support), ប្រព័ន្ធផ្តល់សញ្ញាពេលងងឹតជាមួយសញ្ញាព្រមានពេលថយរថយន្ត, ព្រមានពេលជិះធ្លាក់គន្លង និងរក្សាមិនឱ្យធ្លាក់ពីគន្លងផ្លូវ lane departure warning with lane-keep assist និងមានមុខងារសំខាន់ៗជាច្រើនទៀត។

អ្នកទិញដែលកំពុងស្វែងរកភាពប្រណីតបន្ថែម អាចជ្រើសរើសយក Mazda3 2.5 Turbo ជាមួយនឹងកញ្ចប់ពិសេស Premium Plus ដែលវាមានតម្លៃ 32,450 ដុល្លារ សម្រាប់ប្រភេទ sedan និង 33,750 ដុល្លារ សម្រាប់ប្រភេទ hatchback ។ ប្រភេទខ្ពស់ជាងគេ (ថ្លៃជាងគេ) នឹងមានកៅអីស្បែក, ប្រព័ន្ធ GPS, កាង​ក្រោយខ្មៅរលោង និង HomeLink ។ ប្រព័ន្ធសុវត្ថិភាពបន្ថែមមានដូចជា៖ ហ្វ្រាំងជំនួយខាងក្រោយ, មើលទិដ្ឋភាព360ដឺក្រេជាមួយកាម៉េរាសេនសឺខាងក្រោយ, ប្រព័ន្ធ Traffic jam assist និងផ្សេងៗទៀត៕

អត្ថបទ៖ លីដា
ប្រភព៖ Car Scoops