ហ្វីលីពីន៖ អាជ្ញាធរសុខាភិបាលនៃប្រទេសហ្វីលីពីនបានរាយការណ៍ថា គិតត្រឹមល្ងាចថៃច័ន្ទ ទី ១០ សីហា ម្សិលមិញនេះ ប្រទេសខ្លួនបានរកឃើញអ្នកជំងឺកូវីដ ១៩ ចំនួន ៦ ៩៥៨ ករណីបន្ថែមទៀត ដែលចំនួននេះគឺជាតួលេខអ្នកឆ្លងច្រើនបំផុតប្រចាំថ្ងៃរាប់ចាប់តាំងពីពេលមានការរាតត្បាតជំងឺកូវីដ ១៩ នៅក្នុងប្រទេសហ្វីលីពីនមក។ ចំពោះករណីស្លាប់វិញក៏មានដែរគឺត្រឹមតែមួយថ្ងៃម្សិលមិញនេះ ហ្វីលីពីនមានអ្នកស្លាប់ដោយជំងឺកូវីដ ១៩ រហូតដល់ ២៤ នាក់ឯណោះ។ បើយោងតាមការចុះផ្សាយនៅក្នុងសារព័ត៌មាន Channel News Asia បានបញ្ជាក់ថា ហ្វីលីពីនគឺជាប្រទេសទី ១ ក្នុងតំបន់អាស៊ីអាគ្នេយ៍ដែលមានតួលេខអ្នកឆ្លងជំងឺកូវីដ ១៩ ច្រើនជាងគេតាមពីក្រោយដោយប្រទេសឥណ្ឌូនេស៊ីជាប្រទេសទី​ ២ ដែលមានតួលេខអ្នកឆ្លងសរុបនៅទូទាំងប្រទេសជិត ១៣ ម៉ឺនករណី។

គួរម្លឹកជូនថា តួលេខអ្នកជំងឺកូវីដ ១៩ នៅក្នុងប្រទេសហ្វីលីពីនបន្តកើតឡើងយ៉ាងគំហុកក្នុងរយៈពេលប៉ុន្មានខែចុងក្រោយនេះដែលភាគច្រើនជាករណីចម្លងក្នុងសហគមន៍ ហើយស្ថិតនៅចំពោះមុនស្ថានភាពអាក្រក់មួយនេះ រដ្ឋាភិបាលហ្វីលីពីនបានសម្រេចបិទតំបន់សំខាន់ៗរបស់ខ្លួនជាច្រើននិងដាក់តំបន់ខ្លះស្ថិតក្នុងគ្រាមានអាសន្នទៀតផង។ សូមបញ្ជាក់ផងដែរថា បើគិតត្រឹមម៉ោងចុះផ្សាយនេះហ្វីលីពីនមានអ្នកជំងឺកូវីដ ១៩ សរុបនៅទូទាំងប្រទេសចំនួន ១៣៦ ៦៣៨ ករណី និងស្លាប់ចំនួន ២ ២៩៤ ករណី៕

អត្ថបទ៖ភក្តី

ប្រភព៖ Channel News Asia