រដ្ឋមន្រ្ដីក្រសួងមហាផ្ទៃ បារម្ភចំពោះគ្រឿងញៀនចូលដល់សហគមន៍ ខណៈជំងឺកូវីដ-១៩ មិនចូលដល់សហគមន៍
ភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានបង្ហាញថា សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានបង្ហាញនូវការ ព្រួយបារម្ភចំពោះបញ្ហាគ្រឿងញៀន ដែលបានចូលដល់ក្នុងសហគមន៍ ខណៈជំងឺកូវីដ-១៩មិនទាន់រីករាលដាលដល់សហគមន៍នៅឡើយ។ ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការទីតាំង និងសមិទ្ធផលនានា របស់ស្នងការដ្ឋាននគរបាលខេត្តត្បូងឃ្មុំ នាព្រឹកថ្ងៃទី១៣ ខែសីហា ឆ្នាំ២០២០ សម្ដេចក្រឡាហោម ស ខេង បានស្នើឱ្យអាជ្ញាធរតាមមូលដ្ឋាន ត្រូវបន្ដផ្សព្វផ្សាយអំពីផលវិបាក ចំពោះបញ្ហាការប្រើប្រាស់គ្រឿងញៀន និងផ្សព្វផ្សាយអំពីការការពារជំងឺកូវីដ-១៩។
សម្តេចក្រឡាហោមបានថ្លែងថា “កម្ពុជាមកដល់ពេលនេះមានជំងឺកូវីដ-១៩ មានជាង២០០នាក់ ហើយជំងឺភាគច្រើននាំចូលពីក្រៅហើយចំណុចសំខាន់មិនមានអ្នកស្លាប់ដោយជំងឺកូវីដ-១៩ ហើយព្យាបាលបានទៀត”។ សម្ដេចក្រឡាហោមបានបន្ដថា ជំងឺកូវីដ-១៩នៅកម្ពុជាមិនទាន់ឆ្លងទៅដល់សហគមន៍ នៅតាមជន បទឡើយ ដូច្នេះប្រជាពលរដ្ឋត្រូវមានការប្រុងប្រយ័ត្នចំពោះជំងឺកូវីដ-១៩ គ្រប់ពេលវេលា។ សម្ដេចក្រឡាហោមបានបន្ថែមថា ក្រោមការដឹកនាំរបស់រាជរដ្ឋាភិបាលកម្ពុជា និងរដ្ឋបាលដែនដី ព្រមទាំងភាគីពាក់ព័ន្ធមួយចំនួនបានរួមគ្នាខិតខំប្រឹងប្រែង ដើម្បីទប់ស្កាត់ជំងឺកូវីដ-១៩។
សម្ដេចក្រឡាហោមក៏បានថ្លែងអំណរគុណចំពោះភាគីពាក់ព័ន្ធទាំងអស់ ដែលបានចូលរួមទប់ស្កាត់ជំងឺ កូវីដ-១៩។ ទោះបីយ៉ាងណាក៏ដោយ ជំងឺកូវីដ-១៩ មិនទាន់ ធូរស្រាលនៅឡើយ ដូច្នេះបន្ដទប់ស្កាត់ជំងឺ កូវីដ-១៩បន្ថែមទៀត។ សម្ដេចក្រឡាហោម ស ខេង បានថ្លែងបញ្ជាក់ថា “បទល្មើសគ្រឿងញៀន ខ្ញុំមានការបារម្ភច្រើន ចង់ច្រើនជាងកូវីដ-១៩ទៀត ដោយសារកូវីដ-១៩មិនទាន់ដល់ជនបទទេ។ ប៉ុន្ដែគ្រឿងញៀនបានចាប់ផ្ដើមបញ្ជា្របដល់ជនបទហើយ។ ខ្ញុំបានពិនិត្យរបាយការណ៍ប្រចាំថ្ងៃរបស់ខេត្តទាំងអស់ គឺខ្ញុំកត់សម្គាល់បញ្ហាទាំងប៉ុន្មាននឹងទេ ជាពិសេសបញ្ហាគ្រឿងញៀន បញ្ហាចរាចរណ៍”។
សម្ដេចក្រឡាហោមក៏បានអំពាវនាវដល់អាជ្ញាធរ ត្រូវបន្ដទប់ស្កាត់គ្រឿងញៀន នៅតាមសហគមន៍ ហើយពេលណាគ្រឿងញៀនរាលដាលក្នុងសហគមន៍កាន់តែខ្លាំង នាំឱ្យពិបាក ធ្វើការទប់ស្កាត់។ ទន្ទឹមនេះ នាពេលកន្លងមកអាជ្ញាធរ ក៏បានបង្ក្រាបបទល្មើស គ្រឿងញៀន បានធ្វើយ៉ាងច្រើនផងដែរ។
សម្ដេចក្រឡាហោម ស ខេង ក៏បានរម្លឹកផងដែរថា នៅពេលមិនទាន់រឹតបន្ដឹងច្បាប់ចរាចរណ៍ គឺមានអ្នកស្លាប់ក្នុងមួយថ្ងៃចាប់ពី ០៦នាក់ ទៅ០៧នាក់ តែក្រោយការរឹតបន្ដឹង ច្បាប់ចរាចរណ៍ គឺមានស្លាប់ក្នុងមួយថ្ងៃ ២-៣-៤នាក់។ សម្ដេចក្រឡាហោមបានបន្ថែមទៀតថា “ការរឹតបន្ដឹងច្បាប់ចរាចរណ៍មិនអាចលុបបំបាត់មិនឱ្យមានអ្នកស្លាប់ ដោយសារគ្រោះថ្នាក់ចរាចរណ៍ ១០០ភាគរយ បានឡើយ”៕
ប្រភព៖ ក្រសួងព័ត៌មាន