រកឃើញទំនិញហួសកាលបរិច្ឆេទប្រើប្រាស់ទម្ងន់សរុបចំនួន ៤៧៤.១២ លីត្រ និង ៣៨ គីឡូក្រាម នៅផ្សាររវៀង ខេត្តព្រះវិហារ

ខេត្តព្រះវិហារ៖ នៅថ្ងៃព្រហស្បតិ៍ ៩រោច ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៣ ខែសីហា ឆ្នាំ២០២០ មន្ត្រីសាខា ក.ប.ប. ខេត្តព្រះវិហារ ដោយមានកិច្ចសហការចូលរួមជាមួយពីមន្ត្រីមន្ទីរពាណិជ្ជកម្មខេត្ត និងអាជ្ញាធរដែនដី បានបន្តចុះត្រួតពិនិត្យ និងផ្សព្វផ្សាយអំពីគុណភាព សុវត្ថិភាពម្ហូបអាហារ ម្ហូបអាហារវេចខ្ចប់ស្រាប់ នៅផ្សាររវៀង ក្នុងភូមិរវៀងជើង ឃុំរបៀប ស្រុករវៀង ខេត្តព្រះវិហារ។

ជាលទ្ធផល មន្ត្រីជំនាញបានរកឃើញទំនិញហួសកាលបរិច្ឆទប្រើមួយចំនួន រួមមាន៖
-ទឹកក្រូចចម្រុះ ចំនួន ២៩ដប ស្មើនឹង ៩.៥៧ លីត្រ
-ទឹកដោះគោជូ ចំនួន ០៣កេស + ០៩ដប ស្មើនឹង ២៨.១៧ លីត្រ
-ទឹកផ្លែឈើ ចំនួន ២៨កេស + ០៦ដប ស្មើនឹង ៤៣៣.០៨ លីត្រ
-ស្រាបៀរ ចំនួន ១០កំប៉ុង ស្មើនឹង ៣.៣០ លីត្រ
-ស្ករគ្រាប់ ចំនួន ០១ស្បោងធំ ស្មើនឹង ០៨ គីឡូក្រាម
-នំចម្រុះ ចំនួន ០២បាវ ស្មើនឹង ២៤ គីឡូក្រាម
-ទឹកប៉េងប៉ោះ ចំនួន ០៦ដប ស្មើនឹង ៦ គីឡូក្រាម។

បន្ទាប់មកមន្ត្រីសាខា ក.ប.ប. ខេត្តព្រះវិហារបានធ្វើកំណត់ហេតុដកហូត ទំនិញទាំងនោះយកទៅរក្សាទុកដើម្បីធ្វើការកម្ទេចចោល និងបានធ្វើការណែនាំដល់អាជីវករដទៃ អោយយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀត ៕

ប្រភព៖ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF