នៅឥណ្ឌាកាន់តែធ្ងន់ធ្ងរហើយ ក្នុងរយៈពេលតែ១ថ្ងៃរកឃើញអ្នកជំងឺកូវីដ ១៩ ជិត ១០ម៉ឺននាក់ ឯអ្នកស្លាប់ជាង១ពាន់នាក់
កូវីដ-១៩ September 14, 2020 lyda

ឥណ្ឌា៖ សារព័ត៌មាន Channel News Asia បានរាយការណ៍ថា កាលពីថ្ងៃអាទិត្យទី១៣ ខែកញ្ញា ម្សិលមិញនេះ ប្រទេសឥណ្ឌាបានរកឃើញអ្នកជំងឺកូវីដ ១៩ ថ្មីចំនួន ៩៤,៣៧២ ករណីបន្ថែមទៀត ដែលធ្វើឲ្យតួលេខអ្នកឆ្លងសរុបនៅក្នុងប្រទេសមួយនេះបានកើតឡើងដល់ជាង ៤.៨ លានករណី។ ទន្ទឹមនឹងមានករណីអ្នកឆ្លងថ្មីនេះ តួលេខអ្នកស្លាប់ដោយជំងឺកូវីដ ១៩ ក៏បានកើនឡើងផងដែរ ពោលគឺគិតត្រឹមថ្ងៃម្សិលមិញនេះឥណ្ឌាមានតួលេខអ្នកស្លាប់ចំនួន ១,១១៤ ករណី។

បើតាមអាជ្ញាធរសុខាភិបាលឥណ្ឌាបានបញ្ជាក់ថា ការរាតត្បាតជំងឺកូវីដ ១៩ បានកើតមានស្ទើរតែគ្រប់រដ្ឋ ហើយចំពោះរដ្ឋធំៗនិងជារដ្ឋសម្បូរអ្នកមានរស់នៅនោះ គឺមានតួលេសអ្នកឆ្លងនិងស្លាប់ច្រើនជាងគេបំផុត។ ជាក់ស្តែងគ្រាន់តែរដ្ឋ Maharashtra មួយតែម្នាក់ឯងមានអ្នកឆ្លងថ្មីរហូតដល់ទៅ ៨,២០៤ ករណីទៅហើយកាលពីម្សិលមិញនេះ ខណៈរដ្ឋមួយនេះមានពលរដ្ឋសរុបប្រមាណជា ១៣០ លាននាក់កំពុងរស់នៅ។ សូមបញ្ជាក់ជូនថា ឥណ្ឌាគឺជាប្រទេសមានតួលេខអ្នកឆ្លងជំងឺកូវីដ ១៩ ច្រើនបំផុតលំដាប់ទី ២ នៅលើពិភពលោកបន្ទាប់ពីអាមេរិក ហើយគិតត្រឹមពេលចុះផ្សាយនេះឥណ្ឌាមានអ្នកជំងឺកូវីដ ១៩ សរុបនៅទូទាំងប្រទេសចំនួន ៤,៨៤៥ ០០៣ ករណី និងស្លាប់សរុបចំនួន ៧៩,៧៥៤ ករណីផងដែរ៕

អត្ថបទ៖ ភក្តី

ប្រភព៖ Channel News Asia