រាជរដ្ឋាភិបាលប្រកាសគម្រោងសាងសង់ផ្លូវជាតិចំនួន៣ខ្សែបន្ថែមទៀតនៅខេត្តកំពត

រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឲ្យដឹងថា ប្រមុខរាជរដ្ឋាភិបាលកម្ពុជាបានប្រកាសគម្រោងសាងសង់ផ្លូវជាតិចំនួន៣ខ្សែ បន្ថែមទៀតនៅខេត្តកំពត ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ។ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា គម្រោងសាងសង់ផ្លូវជាតិសំខាន់ទាំង៣ខ្សែបន្ថែមទៀតនេះ រួមមានផ្លូវលេខ៤១ តភ្ជាប់ផ្លូវជាតិលេខ៤ ទៅកំពត, ផ្លូវជាតិលេខ៣១ នៅខេត្តកំពត និងផ្លូវជាតិលេខ៣៣ នៅខេត្តទៀត ដែលជាគម្រោង អាទិភាពក្នុងការអភិវឌ្ឍ ហេដ្ឋារចនាសម្ព័ន្ធក្នុងខេត្ត នឹងជួយសម្រួលដល់ការធ្វើចរាចរណ៍របស់ប្រជាពលរដ្ឋ។

សម្ដេចតេជោបានបន្តទៀតថា គម្រោងទាំងបីខាងលើនេះ បានបញ្ចប់ការចរចា និងឯកភាពគ្នារួចរាល់ ហើយបានប្រគល់ឱ្យឯកឧត្តមឧបនាយករដ្ឋមន្ដ្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការនិងដឹកជញ្ជូន ដើម្បីចុះហត្ថលេខាសាងសង់តែម្ដង ដោយមិនទុកយូរនោះឡើយ។

សំឡេង៖ “ខ្ញុំបានសម្រេចគម្រោង៣ សុំលុយពីចិនទៀតហើយ ព្រោះចរចាត្រូវថ្លៃហើយ ទី១ ផ្លូវ៤១ តភ្ជាប់ផ្លូវជាតិលេខ៤ ចុះទៅខេត្តកំពត ទី២ គឺផ្លូវជាតិលេខ៣១ នៅខេត្តកំពត ទី៣ ផ្លូវជាតិលេខ៣៣ នៅខេត្តកំពតទៀត នេះគឺយើងបានឯកភាពគ្នាចរចាជាគម្រោង ឋិតនៅក្នុងគម្រោងហើយបានប្រថាប់ត្រានិងចុះហត្ថលេខាឱ្យឯកឧត្តម អូន ព័ន្ធមុនីរ័ត្ន និងឯកឧត្តមស៊ុន ចាន់ថុល ចុះហត្ថលេខា ហើយនៅពេលដែលចុះហត្ថលេខាហើយ គឺចាប់ផ្ដើមធ្វើតែម្ដង ព្រោះជាធម្មតានិយាយរួមទៅការដ្ឋានទាំងឡាយ អត់មានថយ ក្រោយនោះទេ”។ ប្រមុខរាជរដ្ឋាភិបាលកម្ពុជា បានអះអាងទៀតថា រហូតមកដល់ពេលនេះ ការដ្ឋានស្ថាបនាផ្លូវរបស់ចិន និងការដ្ឋានស្ថាបនាផ្លូវផ្សេងៗទៀត នៅបន្ដដំណើរការធម្មតា មិនមានការរាំងស្ទះអ្វីនោះទេ។ សម្តេចមានប្រសាសន៍ទៀតថា មានហេដ្ឋារចនាសម្ព័ន្ធ ទើបបង្កលក្ខណៈងាយស្រួលដល់ប្រជាពលរដ្ឋក្នុងការធ្វើដំណើរ និងប្រកបរបរផ្សេងៗ ៕

ប្រភព៖ ក្រសួងព័ត៌មាន