រយៈពេលជិត ១១ខែ កន្លងមកនេះ ជំងឺកូវីដ១៩ បានចម្លងដល់មនុស្សជាង ៣៩លាននាក់ នៅជុំវិញពិភពលោក ខណៈស្លាប់ជាង ១លាន ១០ម៉ឺននាក់
កូវីដ-១៩ October 16, 2020 lyda

យោងតាមការធ្វើបច្ចុប្បន្នភាពចុងក្រោយរបស់ Worldometers សម្រាបរសៀលថ្ងៃសុក្រ ទី១៦ ខែតុលា ឆ្នាំ២០២០ បានបង្ហាញថា ចំនួនអ្នកឆ្លងជំងឺ COVID-19 នៅទូទាំងពិភពលោកពេលនេះបានកើនដល់ជាង ៣៩ លាននាក់ ខណៈការស្លាប់បានកើនដល់ ១លាន ១០ម៉ឺននាក់ និងមានអ្នកជាសះស្បើយជាង ២៩លាននាក់។ គិតមកទល់ពេលនេះគឺរយៈពេលជិត ១១ខែមកហើយ ដែលជំងឺ COVID-19 បានរាតត្បាតនៅជុំវិញពិភពលោក។ ពោលគឺចាប់តាំងពីវាបានបង្ហាញវត្តមានដំបូងនៅប្រទេសចិន កាលពីចុងឆ្នាំ២០១៩ ប៉ុន្តែយ៉ាងណាវាហាក់មិនបានចុះថយទៅវិញនោះទេ។

សហរដ្ឋអាមេរិកនៅតែជាប្រទេសដែលមានការឆ្លងច្រើនជាងគេ ជាមួយនឹងករណីសរុប ៨.២ លានករណី និងមានអ្នកស្លាប់សរុបចំនួន ២២ម៉ឺននាក់។ នាពេលថ្មីៗនេះអាមេរិកមានការកើនឡើងនូវករណីថ្មីៗគួរឱ្យកត់សម្គាល់ ជាមួយនឹងករណីថ្មីជាង ៦ម៉ឺន ត្រូវបានកត់ត្រាក្នុងរយៈពេល ២៤ម៉ោងចុងក្រោយនេះ។ ប្រទេសឥណ្ឌាមានករណីសរុប ៧.៣ លានករណី និងមានអ្នកស្លាប់ជាង ១១ម៉ឺននាក់ ប៉ុន្តែឥឡូវនេះវាមិនមែនជាប្រទេសដែលមានករណីប្រចាំថ្ងៃច្រើនបំផុតទៀតទេ។  ចំណែកប្រេស៊ីលនៅតែឈរលេខ ៣ ដោយមានករណីសរុប ៥.១ លាននាក់ និងមានអ្នកស្លាប់សរុប ១៥ម៉ឺននាក់៕

អត្ថបទ៖ លីដា
ប្រភព៖ Worldometers