ស្នងការខេត្តសៀមរាប ធ្វើការបំភ្លឺពាក់ព័ន្ធការបង្ហោះលើហ្វេសប៊ុក ករណីផាកពិន័យមិនពាក់មួកសុវត្ថិភាពនៅខ្លោងទ្វារទន្លេអុំ ខេត្តសៀមរាប
រាជធានីភ្នំពេញ៖ តាមការចុះផ្សាយរបស់ អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី៣១ ខែតុលា ឆ្នាំ២០២០ វេលាម៉ោងប្រហែល ០៩និង៣០នាទីព្រឹក កម្លាំងនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានដាក់គោលដៅត្រួតពិនិត្យច្បាប់ និងរឹតបន្តឹងចំពោះការបើកបរល្មើសនឹងផ្លាកសញ្ញាហាមឃាត់ (ផ្លូវឯកទិស) នៅចំណុចផ្លូវខ្លោងទ្វារទន្លេអុំ បានធ្វើការឃាត់ម៉ូតូចំនួន ២គ្រឿង។
អ្នកបើកបរម៉ូតូមិនពាក់មួកសុវត្ថិភាពទាំង ៤នាក់ (មានទាំងអ្នកបើកបរ និងអ្នករួមដំណើរ) បើកបរពីត្បូងទៅជើង ដើម្បីធ្វើការពិន័យ ដោយផ្អែកលើស្ថានភាពជាក់ស្តែង ពួកគាត់បានស្នើសុំអោយសមត្ថកិច្ចយើងធ្វើការផាកពិន័យមិនពាក់មួកចំនួនតែ ១នាក់គត់ និងបានអប់រំណែនាំចំនួន៣នាក់ បន្ថែមទៀតចំពោះអ្នកដែលមិនពាក់មួកសុវត្ថិភាព។ ដែលមានបង្កាន់ដៃពិន័យអន្តរការណ៍លេខ០០៩៤៨៣១ និងបង្កាន់ដៃបង់ប្រាក់ពិន័យលេខ ០៧០-២-០២០០០១៧៣៨៩ ចំនួនទឹកប្រាក់ ៦០,០០០ ៛ (ប្រាំមួយម៉ឺនរៀល) ចុះថ្ងៃទី៣១/១០/២០២០ តាមមាត្រា៦ ចំណុច១ក នៃអនុក្រឹត្យលេខ៣៩ អនក្រ.បក អំពើល្មើសនឹងច្បាប់ស្តីពីចរាចរណ៍ផ្លូវគោក។
សេចក្តីដូចបានជំរាបជូនខាងលើនេះ សូមសាធារណជន អ្នកសារព័ត៌មាន ពិសេសបងប្អូនដែលនិយមប្រើប្រាស់បណ្តាញទំនាក់ទំនងសង្គមហ្វេសបុក មេត្តាជ្រាបជាព័ត៌មាន និងឈប់មានការយល់ច្រឡំ លើសមត្ថកិច្ចយើងចុះរឹតបន្តឹងច្បាប់នៅចំណុចខ្លោងទ្វារទន្លេអុំ ៕
ប្រភព៖ អគ្គស្នងការដ្ឋាននគរបាលជាតិ