កូនប្រុសច្បងរបស់លោក ដូណាល់ ត្រាំ គឺលោក ដូណាល់ ត្រាំ ជូនៀ បានតេស្ដវិជ្ជមានជាមួយជំងឺកូវីដ១៩

យោងតាមការចុះផ្សាយរបស់សារព័ត៌មាន Channel News Asia នៅថ្ងៃសៅរ៍ ទី២១ ខែវិច្ឆិកា ឆ្នាំ២០២០ នេះបាននិយាយថា លោក ដូណាល់ ត្រាំ ជូនៀ (Donald Trump Jr) ដែលជាកូនប្រុសច្បងរបស់លោក ដូណាល់ ត្រាំ បានធ្វើតេស្តវិជ្ជមានជាមួយជំងឺ COVID-19 ក្នុងសប្តាហ៍នេះ ហើយក៏មិនមានចេញរោគសញ្ញាអ្វីដែរ។ អ្នកនាំពាក្យរបស់លោកបាននិយាយថា លោក ត្រាំ ជូនៀ បានដឹងពីការធ្វើរោគវិនិច្ឆ័យរបស់លោកកាលពីដើមសប្តាហ៍នេះ ដោយគាត់មិនមានរោគសញ្ញាអ្វីទេ ហើយបាននិងកំពុងនៅដាច់ដោយឡែកពីគេ។

លោក ដូណាល់ ត្រាំ ជូនៀ គឺជាសមាជិកចុងក្រោយនៃក្រុមគ្រួសាររបស់ប្រធានាធិបតីលោក ដូណាល់ ត្រាំ ដែលបានឆ្លងជំងឺ COVID-19 នេះ។ ទាំងលោកប្រធានាធិបតី លោកជំទាវទីមួយ និងកូនប្រុសរបស់ពួកគេទាំង ២ គឺ បារុន ត្រាំ សុទ្ធតែបានឆ្លងជំងឺនេះ និងបានជាសះស្បើយរួចហើយ។ លោក Andrew Giuliani ដែលជាកូនប្រុសរបស់លោក Rudy Giuliani ដែលជាមេធាវីផ្ទាល់ខ្លួនរបស់លោក ដូណាល់ ត្រាំ ក៏បាននិយាយថា លោកបានធ្វើតេស្តវិជ្ជមានជាមួយជំងឺ COVID-19 កាលពីថ្ងៃសុក្រផងដែរ៕

អត្ថបទ៖ លីដា
ប្រភព៖ Channel News Asia