នរកណាស់! សូម្បីតែកុដិព្រះចៅអធិការវត្តក៏មិនលើកលែង ចូលគាស់លួចលុយអស់មិនចេះតិច
បន្ទាយមានជ័យ ៖ មានជនមិនស្គាល់មុខបានលួចគាស់សោរទ្វារកុដិព្រះចៅអធិការវត្តមុន្នីហែមវ័ន្តប៉ោយចារ ស្ថិតក្នុងភូមិប៉ោយចារ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ។ ហេតុការណ៍បង្កឲ្យមានការភ្ញាក់ផ្អើលនេះបានកើតឡើងនៅវេលាម៉ោង១១និង៤០នាទីព្រឹកថ្ងៃទី២២ ខែធ្នូ ឆ្នាំ២០២០ ខណ:ព្រះចៅអធិការវត្តនិមន្តទៅឆាន់ចង្ហាន់នៅសាលាឆាន់ខាងជើងកុដិប្រហែល១០០ម៉ែត្រ។ ប្រភពពីនគរបាលមូលដ្ឋានបានឲ្យដឹងថា ព្រះចៅអធិការព្រះនាម អ៊ុល ឈី ព្រះជន្ម៧០ព្រះវស្សា គង់នៅវត្តមុន្នីហែមវ័ន្តប៉ោយចារ ។
ព្រះចៅអធិការវត្តបានមានសង្ឃដីកាឲ្យដឹងថា នៅមុនពេលកើតហេតុព្រះអង្គបាននិមន្តទៅសាលាឆាន់ ដែលនៅខាងជើងកុដិព្រះអង្គគង់នៅ ប្រហែល១០០ម៉ែត្រ ដោយមុនពេលនិមន្តចេញទៅឆាន់ចង្ហាន់ ព្រះអង្គបានបិទទ្វារចាក់សោនិងបិទបង្អួច ។ ពេលឆាន់ចង្ហាន់រួច ព្រអង្គនិមន្តមកដល់កុដិវិញស្រាប់តែឃើញស្នាមឆ្កឹះសោរទ្វារកុដិ នៅខាងក្នុងកុដិឃើញធុងមានទំហំ០៤តឹកX០២តឹក ធ្វើអំពីស័ង្កសី ដែលព្រះអង្គទុកនៅក្រោមគ្រែសឹង្ហរបស់ព្រះអង្គ មានស្នាមវះដោយកាំបិតយកលុយខ្មែរអស់ក្នុងកេសដែកនោះចំនួន៩.០០០.០០០រៀល(ប្រាំបួនលានរៀល), លុយខ្មែរទុកលើគ្រែចំនួន៣.៥០០.០០០រៀល(បីលានប្រាំសែនរៀល), ប្រាក់ថៃចំនួន១០.០០០បាត(១ម៉ឺនបាត), ទូរស័ព្ទដៃ០១គ្រឿង ។
ព្រះអង្គមានសង្ឃដីកាបន្តថា មុនពេលព្រះអង្គនិមន្តចេញពីកុដិទៅសាលាឆាន់បានឃើញមនុស្សប្រុសម្នាក់ មិនស្គាល់អត្តសញ្ញាណស្លៀកពាក់ស្អាតបាតអង្គុយលើម៉ូតូនៅខាងលិចកុដិប្រហែល២៥ម៉ែត្រ តែព្រះអង្គមិនបានចាប់អារម្មណ៍ នៅពេលត្រឡប់មកកុដិវិញក៏ឃើញទ្វារកុដិរបើកសោរ ។
នគរបាលបានបញ្ជាក់ថា ទាក់ទិនករណីចោរកម្មនេះ កម្លាំងនគរបាលកំពុងដុតដៃដុតជើង ស្វែងរកមុខសញ្ញាចោរលួចយកទៅផ្តន្ទាទោសតាមច្បាប់ ៕
ប្រភព៖ អគ្គស្នងការដ្ឋាននគរបាលជាតិ