យោងតាមការចុះផ្សាយរបស់សារព័ត៌មាន The Nation Thailand សម្រាប់ថ្ងៃពុធ ទី១០ ខែកុម្ភៈ ឆ្នាំ២០២១ បានរាយការណ៍ថា ប្រទេសថៃបានកត់ត្រាករណីថ្មីនៃជំងឺ COVID-19 ចំនួន ១៥៧ ករណី នៅក្នុងរយៈពេល ២៤ ម៉ោងចុងក្រោយនេះ ដោយក្នុងនោះមាន ៨នាក់ ​គឺជាករណីនាំចូលពីបរទេស ដែលនាំឱ្យចំនួនឆ្លងសរុបចាប់តាំងពីប្រទេសនេះមានករណីជំងឺ COVID-19 ដំបូងកាលពីឆ្នាំមុន កើនដល់ ២៣,៩០៣ ករណី។ ក៏មានការស្លាប់ថ្មីម្នាក់ត្រូវបានកត់ត្រាផងដែរ ដែលនាំឱ្យការស្លាប់សរុបបានកើនឡើងដល់ ៨០ ករណី។

គិតត្រឹមថ្ងៃពុធចំនួនករណីជំងឺ COVID-19 ដែលបានបញ្ជាក់នៅក្នុងប្រទេសថៃ បានកើនឡើងដល់ ២៣,៩០៣ នាក់ ហើយក្នុងនោះមាន ២១,៣២៩ នាក់ ជាការចម្លងក្នុងស្រុក ខណៈ ២,៥៧៤ នាក់ ជាករណីនាំចូល។ រហូតមកដល់ពេលនេះមានអ្នកជំងឺចំនួន ១៨,៩១៤ នាក់ បានជាសះស្បើយ និងត្រូវបានរំសាយចេញពីមន្ទីរពេទ្យ ខណៈអ្នកជំងឺចំនួន ៤,៩០៩ នាក់ កំពុងសម្រាកព្យាបាលនៅឡើយទេ។ ចំណែកករណីនៅទូទាំងពិភពលោកបានកើនដល់ ១០៧.៤ លាននាក់ និងការស្លាប់សរុបបានកើនដល់ ២.៣៥​ លាននាក់ហើយ៕

អត្ថបទ៖ លីដា
ប្រភព៖ The Nation Thailand