ខ្មែរសែស្រឡាយ ចិន-វៀតណាម រាប់ពាន់នាក់ មកពីគ្រប់ទិសទី មកទិញអំពៅខ្មៅ និងអុជធូបបន់ស្រន់ សុំសេចក្ដីសុខ រកទទួលទៀនមានបាន នៅវិហារលោកតាចិនធំ ក្រុងតាខ្មៅ
ខេត្តកណ្ដាល ៖ ចាប់ពីពាក់កណ្ដាលយប់ថ្ងៃសែនចូលឆ្នាំចិន ឈានចូលថ្ងៃទីទី១ នៃថ្ងៃបុណ្យប្រពៃណីចិន-វៀតណាម ត្រូវនឹងថ្ងៃទី១១ ឈានចូលថ្ងៃទី១២ ខែកុម្ភៈ ឆ្នាំ២០២១នេះ សង្កេតឃើញថាបងប្អូនប្រជាពលរដ្ឋខ្មែរដែលជាប់សែស្រឡាយចិនរាប់ពាន់នាក់ មកពីគ្រប់ទិសទីបានមកទិញអំពៅខ្មៅ និងអុជធូបបន់ស្រន់ សុំសេចក្ដីសុខ រកទទួលទៀនមានបាន នៅរោងលោកតាចិនធំក្រុងតាខ្មៅ។
ចំណែកឯ អំពៅខ្មៅរាប់ពាន់ដើម និងផ្លែកន្ទឹម ព្រមទាំងផ្លែឈើសំរាប់សែនជាច្រើន ត្រូវបានគេយកមកដាក់លក់នៅលើផ្លូវខាងមុខរោងលោកតាចិន ។ បើទោះបីមានលក់ច្រើនបែបនេះក្ដី ក៏តម្លៃនៅតែថ្លៃដដែល ព្រោះតែអ្នកទៅទិញច្រើនកុះករ ។ អំពៅខ្មៅមួយដើម តម្លៃ៨ពាន់ ទៅ១ម៉ឺនរៀល ចំណែកមែកកន្ទឹមវិញ មានផ្លែផ្កាមួយបាច់ ប៉ុនកដៃ តម្លៃ៧ពាន់ ទៅ១ម៉ឺនរៀលដែរ ។
ពីមួយឆ្នាំទៅមួយឆ្នាំ អ្នកមកដុតធូបនៅរោងលោកតាចិនធំកើនឡើងរៀងរាល់ឆ្នាំ ។ លោកពូម្នាក់ ឈ្មោះ គាងបានប្រាប់ឱ្យដឹងថា គាត់មកដុតធូបនៅរោងលោកធំសុំជើងធូប យកទៅផ្ទះនិង ទិញអំពៅខ្មៅ យកទៅ សែននៅផ្ទះគាត់ ដើម្បីសុំសេចក្ដីសុខចំរើនក្នុងក្រុមគ្រួសារ ។ គាត់ថា ជំនឿពីកុងម៉ាគាត់មកនៅថ្ងៃចូលឆ្នាំចិន គឺតែងតែ មកដុតធូប នៅរោងលោកតា សុំសេចក្តីសុខ ចំរើន។ គាត់ប្រាប់ថាទិញអំពៅខ្មៅ មួយដើម១ម៉ឺនរៀល យកទៅសែននៅផ្ទះ រកស៊ីឡើង ដូចថ្នាំងអំពៅខ្មៅអញ្ចឹង ជាជំនឿតាំង ពីកុងម៉ាមក។
ងាកមកដឹងពីប្រវត្តិដើមអំពៅខ្មៅនេះ ត្រូវបានលោកតាម្នាក់នៅមើលការខុសត្រូវនៅរោងលោកតាចិនធំនេះ បានប្រាប់ឱ្យដឹងដែរថា កាលពីព្រេងនាយ មានគ្រួសារមួយថ្ងៃចូលឆ្នាំចិន បានយកនំចំណីផ្លែឈើទៅសែន នៅរោងលោកតាចិននៅឆ្ងាយពីផ្ទះ ។ ពេលសែនរួចហើយ រៀបត្រឡប់មកផ្ទះវិញបានទិញអំពៅខ្មៅនៅរោងលោកតាយកមកផ្ញើកូនដែលនៅផ្ទះ ។ ពេលត្រឡប់មកដល់ផ្ទះ ស្រាប់តែភ្លើងកំពុងឆេះផ្ទះគាត់ យ៉ាងសន្ធោសន្ធៅ ។ ពីនាក់ប្ដីប្រពន្ធភ័យស្លន់ស្លោកាច់មែកឈើ វាយពន្លត់ភ្លើង ក៏មិនរលត់ ។ ពេលនោះបុរសជាប្ដីបានយកដើមអំពៅខ្មៅដែលទិញពីរោងលោកតាមកវាយភ្លើង ដែលកំពុងឆេះខ្លាំងនោះរលត់យ៉ាងលឿនអស់ទៅ ។ ចាប់ពីពេលនោះមក ជនជាតិចិនមានជំនឿតៗគ្នាមកថា ដើមអំពៅខ្មៅយកមកពីរោងលោកតាចិន ទៅសែននៅផ្ទះគឺបានត្រជាក់ត្រជុំ បណ្ដេញគ្រោះអាក្រក់ចង្រៃ និងនាំសេចក្តីសុខសប្បាយមកក្នុងក្រុមគ្រួសាររកទទួលទានមានបានផងដែរ ។
ចាប់ពីពេលនោះមក ជនជាតិចិន មានជំនឿតៗគ្នាមកថា ដើមអំពៅខ្មៅ យកមកពីរោងលោកតាចិន ទៅសែននៅផ្ទះ គឺ បានត្រជាក់ត្រជុំ បណ្ដេញគ្រោះអាក្រក់ចង្រៃ និងនាំសេចក្តីសុខសប្បាយ មកក្នុងក្រុមគ្រួសារ រកទទួលទានមានបានផងដែរ។
លោក ឈុន គៀ ប្រធានសមាគមនខ្មែរ-ចិនក្រុងតាខ្មៅ បានប្រាប់ឱ្យដឹងថា អ្នកតាចិននៅក្រុងតាខ្មៅ ឈ្មោះប៉ោសែ ហៅលោកតាធំ ជាលោកតាចិនដែលធំជាងគេ ក្នុងស្រុកខ្មែរ ដែលវិហារលោកតានេះ មានទីតាំងក្នុងតាមបណ្ដោយផ្លូវ២១A ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ។ ដោយសារលោតាធំជាងគេ នឹងស័ក្តិសិទ្ធិ ទើបមានអ្នកជាប់សែស្រឡាយចិនច្រើននាក់មកពីគ្រប់ទិសទី តែងតែមកអុជធូបបន់ស្រន់ សុំសេចក្ដីសុខ រកទទួលទៀនមានបាន ជារៀងរាល់ឆ្នាំ៕
ដោយ៖ បងម៉េង ខ្មែរណូត