ងាកមើលផ្លូវច្បាប់វិញ! តាមមាត្រា៦១៥ ជនណាប្រើប្រាស់ដោយគ្មានសិទ្ធិនូវយានយន្ត ដែលមានសញ្ញាសម្គាល់ខាងក្រៅ ប្រើប្រាស់ដោយនគរបាល ឬយោធាត្រូវផ្តន្ទាទោសដាក់ពន្ធនាគារពី១ខែទៅ១ឆ្នាំ និងពិន័យជាប្រាក់ពី ១សែនរៀលទៅ ២លានរៀល

កន្លងទៅថ្មីៗនេះ ផ្ទុះការរិះគន់យ៉ាងខ្លាំងនៅក្នុងបណ្តាញសង្គមហ្វេសប៊ុក ក្រោយគេបានឃើញកូនសិស្សថ្នាក់ទី១១ម្នាក់ បានបើកឡានប៉ូលីសស្លាក់លេខ ន.ប 2.8763 ដោយបំពាក់ជាមួយនឹងស៊ីរ៉ែន រួមទាំងកង់ស្ព័រ ទៅរៀននៅសាលារៀនក្នុងសាខាជ្រោយចង្វារ។ ក្រោយកើតមានករណីនេះ អាជ្ញាធរបានធ្វើការស្រាវជ្រាវរកឃើញក្មេងប្រុសនោះ ដែលមានឈ្មោះ តាន់​ សម្បត្តិឧត្តម​​ ព្រមជាមួយម្ចាស់រថយន្តត្រូវជាបងប្រុសឈ្មោះ​ តាន់​ វិទ្យាបុត្រ​ ជាមន្ត្រីនគរបាលនៅបណ្ឌិតសភានគរបាលជាតិ​ រួមជាមួយម្ចាស់ដេីមរថយន្តឈ្មោះ​ ភ័ណ្ឌ​ ជីវិន​ ជាមន្ត្រីនគរបាលនៅអគ្គនាយកដ្ឋានអន្តោប្រវេសន៍​។

បើយោងតាមក្រមព្រហ្មទណ្ឌ នៃព្រះរាជាណាចក្រកម្ពុជា មាត្រា ៦១៥ ត្រូវផ្តន្ទាទោសដាក់ពន្ធនាគារពី ១ខែ ទៅ១ឆ្នាំ និងពិន័យជាប្រាក់ពី១សែនរៀល ទៅ២លានរៀល ចំពោះជនណាប្រើប្រាស់ដោយគ្មានសិទ្ធិនូវយានយន្ត ដែលមានសញ្ញាសម្គាល់ខាងក្រៅ ប្រើប្រាស់ដោយនគរបាល ឬយោធា៕