ប្រធានាធិបតីប្រទេសតង់ហ្សានីបានទទួលមរណភាពក្នុងវ័យ ៦១ឆ្នាំ ក្រោយមានពាក្យចចាមអារ៉ាមថា គាត់ឆ្លងជំងឺកូវីដ១៩

យោងតាមការចុះផ្សាយរបស់សារព័ត៌មាន BBC បានរាយការណ៍ថា ប្រធានាធិបតីនៃប្រទេសតង់ហ្សានីលោក John Magufuli បានទទួលមរណភាពក្នុងវ័យ ៦១ឆ្នាំ។ បើតាមលោកស្រី Samia Suluhu Hassan ដែលជាអនុប្រធានាធិបតីរបស់ប្រទេស បាននិយាយនៅក្នុងសុន្ទរកថាមួយនៅលើកញ្ចក់ទូរទស្សន៍ថា លោក John Magufuli បានទទួលមរណភាពកាលពីថ្ងៃពុធដោយសារជំងឺបេះដូង នៅមន្ទីរពេទ្យមួយក្នុងទីក្រុង Dar es Salaam ។ ជម្រាបដែរថាលោក Magufuli មិនបានបង្ហាញមុខជាសាធារណៈអស់រយៈពេលជាង ២សប្តាហ៍ ហើយក៏មានពាក្យចចាមអារ៉ាមអំពីសុខភាពរបស់គាត់ជាច្រើន ចំពេលដែលក្រុមបក្សប្រឆាំងបាននិយាយថា គាត់បានឆ្លងជំងឺ COVID-19 ប៉ុន្តែយ៉ាងណាគ្មានការបញ្ជាក់ច្បាស់លាស់ទេ។

ដូច្នេះយោងតាមរដ្ឋធម្មនុញ្ញរបស់ប្រទេសតង់ហ្សានី លោកស្រី Samia Suluhu Hassan នឹងស្បថចូលកាន់តំណែងជាប្រធានាធិបតីថ្មី ហើយត្រូវកាន់តំណែងឱ្យគ្រប់អាណត្តិរបស់លោក Magufuli ដែលលោកទើបតែបានចាប់ផ្តើមកាលពីឆ្នាំមុនប៉ុណ្ណោះ។ លោក Magufuli ត្រូវបានគេឃើញជាសាធារណៈចុងក្រោយ កាលពីថ្ងៃទី២៧ ខែកុម្ភៈ ប៉ុន្តែយ៉ាងណានាយករដ្ឋមន្រ្តី Kassim Majaliwa បានអះអាងកាលពីសប្តាហ៍មុនថា លោកប្រធានាធិបតីគឺមានសុខភាពល្អ និងកំពុងខិតខំធ្វើការងាររបស់លោក ហើយលោក Kassim Majaliwa ក៏បានស្តីបន្ទោសរាល់ពាក្យចចាមអារាមអំពីសុខភាពរបស់ប្រធានាធិបតី។ យ៉ាងណាក៏ដោយ មេដឹកនាំក្រុមប្រឆាំងលោក Tundu Lissu បានប្រាប់ BBC ថា លោក Magufuli ត្រូវបានគេបញ្ជូនទៅព្យាបាលនៅមន្ទីរពេទ្យប្រទេសកេនយ៉ា ដោយសារជំងឺ COVID-19 ៕

អត្ថបទ៖ លីដា
ប្រភព៖ BBC