ថ្ងៃនេះ ប្រទេសឥណ្ឌារកឃើញករណីជំងឺកូវីដ១៩ថ្មីបន្ថែម ៣៦៨,១៤៧ ករណី ហើយវាគឺជាថ្ងៃទី១២ ជាប់ៗគ្នាមកហើយ ដែលប្រទេសនេះមានករណីប្រចាំថ្ងៃច្រើនជាង ៣០ ម៉ឺននាក់

យោងតាមការចុះផ្សាយរបស់សារព័ត៌មាន DAWN នៅថ្ងៃច័ន្ទ ទី០៣ ខែឧសភា ឆ្នាំ២០២១ បានរាយការណ៍ថា ប្រទេសឥណ្ឌាបានរកឃើញករណីជំងឺ COVID-19 ថ្មីចំនួន ៣៦៨,១៤៧ ករណី នៅក្នុងរយៈពេល ២៤ ម៉ោងចុងក្រោយនេះ ហើយអស់រយៈពេល ១២ ថ្ងៃជាប់ៗគ្នាមកហើយ ដែលប្រទេសនេះមានករណីច្រើនជាង ៣០ ម៉ឺនករណីជារៀងរាល់ថ្ងៃ ដែលធ្វើឱ្យចំនួនឆ្លងសរុបមានជិត ២០ លានករណី។ ប្រទេសនេះក៏បានកត់ត្រាការស្លាប់បន្ថែមចំនួន ៣,៤១៧ ករណី ដែលធ្វើឱ្យចំនួនអ្នកស្លាប់សរុបកើនដល់ ២១៨,៩៥៩ នាក់ នេះបើយោងតាមទិន្នន័យរបស់ក្រសួងសុខាភិបាលប្រទេសឥណ្ឌា។

អ្នកជំនាញបាននិយាយថា ចំនួនឆ្លងពិតប្រាកដអាចនឹងច្រើនជាងនេះពី ៥ ទៅ ១០ដង សម្រាប់ប្រទេសដែលមានពលរដ្ឋច្រើនជាង ១.៣៥ ពាន់លាននាក់មួយនេះ ខណៈដែលតំបន់ទីប្រជុំជនកំពុងប្រឈមនឹងបញ្ហាខ្វះអុកស៊ីសែន ហើយនៅតាមមន្ទីរពេទ្យពោរពេញទៅដោយអ្នកជំងឺ COVID-19 ។ ថ្វីបើការឆ្លងរបស់ប្រទេសឥណ្ឌានៅតែមានចំនួនច្រើន ប៉ុន្តែចំនួនតួលេខសម្រាប់ថ្ងៃនេះគឺថយចុះតិចតួចបើប្រៀបនឹងសប្ដាហ៍កន្លងទៅ។ ទោះជាយ៉ាងណាវានៅតែជាសម្ពាធសម្រាប់រដ្ឋាភិបាលរបស់ប្រទេសនេះ នៅពេលដែលចំនួនករណីជំងឺ COVID-19 ថ្មីកាន់តែកើនឡើងជាបន្តបន្ទាប់ ហើយករណីសកម្មដែលកំពុងមានស្រាប់នៅតែខ្វះខាតមធ្យោបាយក្នុងការព្យាបាល៕

អត្ថបទ៖ លីដា
ប្រភព៖ DAWN