ថ្ងៃនេះ ប្រទេសឥណ្ឌាបានរកឃើញអ្នកឆ្លងជំងឺកូវីដ១៩ ថ្មីចំនួន ២៧៦,១១០ នាក់ និងមរណភាពថ្មីចំនួន ៣,៨៧៤ នាក់

យោងតាមការចុះផ្សាយរបស់សារព័ត៌មាន Channel News Asia នៅថ្ងៃព្រហស្បតិ៍ ទី២០ ខែឧសភា ឆ្នាំ២០២១ បានរាយការណ៍ថា ប្រទេសឥណ្ឌាបានរកឃើញអ្នកឆ្លងជំងឺ COVID-19 ថ្មីចំនួន ២៧៦,១១០ ករណី ក្នុងរយៈពេល ២៤ ម៉ោងចុងក្រោយនេះ ខណៈការស្លាប់ថ្មីបានកើនឡើង ៣,៨៧៤ នាក់។ ដូច្នេះតួលេខនៃការឆ្លងសរុបនៅថ្ងៃនេះ បានធ្វើឱ្យចំនួនករណីឆ្លងសរុបរបស់ឥណ្ឌាមានដល់ ២៥.៧៧ លានករណី ខណៈចំនួនអ្នកស្លាប់សរុបមាន ២៨៧,១២២ នាក់៕

អស់រយៈពេលជាច្រើនខែមកហើយ ដែលប្រទេសឥណ្ឌាបានរងគ្រោះយ៉ាងធ្ងន់ធ្ងរដោយសារជំងឺ COVID-19 ដោយសារតែការបំលែងខ្លួនថ្មីមួយត្រូវបានរកឃើញនៅទីនោះ ដែលបានជំរុញឱ្យមានការកើនឡើងនៃការឆ្លងថ្មីៗ ហើយពេលខ្លះមានដល់ទៅជាង ៤០០,០០០ នាក់ក្នុងមួយថ្ងៃ។ ខណៈមន្ទីរពេទ្យ និងកន្លែងបូជាសព ក៏ដូចជាប្រព័ន្ធសុខាភិបាលមានភាពណែនចង្អៀតលើសលុប វាត្រូវបានគេជឿថា តួលេខការឆ្លង និងការស្លាប់ពិតប្រាកដអាចខ្ពស់ជាងនេះពី ៥ ទៅ ១០ ដង៕

អត្ថបទ៖ លីដា
ប្រភព៖ Channel News Asia