វត្តសារាវ័នតេជោ បញ្ជាក់ថា ព្រះសង្ឃ​ សិស្ស-និស្សិត​ តាជី​-យាយជី​ សរុបចំនួន​ ៣៥១អង្គ/នាក់ ដែលធ្វើតេស្តសំណាក គឺមានវិជ្ជមានតែ ៣២អង្គ/នាក់ ប៉ុណ្ណោះ ក្រៅពីនេះមិនមានឆ្លងបន្តទេ

យោងតាមការបញ្ជាក់នៅលើទំព័រហ្វេសប៊ុករបស់ វត្តសារាវ័នតេជោ បានឲ្យដឹងថា សូមប្រគេនដំណឹង​ និងជូនដំណឹងដល់ព្រះករុណាគ្រប់ព្រះអង្គ​ ព្រមទាំងញាតិញោមពុទ្ធបរិសទ្ធនៅក្នុង​ និងក្រៅប្រទេស​ សូមកុំមានការយល់ច្រឡំ​ ឬមានព័ត៌មានដែលមិនច្បាស់លាស់ពីស្ថានភាព​ វត្តសារាវ័នតេជោ​ ក្នុងពេលបច្ចុប្បន្ន​ដែលកំពង់តែមានកាឆ្លងជំងឺកូវីដ-១៩​ ខ្ញុំព្រះករុណា​អាត្មាភាពសូមបញ្ជាក់ថា​ ព្រះសង្ឃ​ សិស្ស-និស្សិត​ តាជី​-យាយជី​ សរុបមានចំនួន​ ៣៥១អង្គ/នាក់​ ក្នុងការពិនិត្យសំណាកទាំងអស់បានរកឃេីញអ្នកវិជ្ជមានចំនួន​ ៣២អង្គ/នាក់​ ព្រះសង្ឃ​មានចំនួន​ ១៧អង្គ​ សិស្ស-និស្សិត​មានចំនួន​ ១១នាក់​ យាយជី​មានចំនួន​ ៤នាក់អ្នកមានវិជ្ជមានទាំងអស់​ បានយកទៅព្យាបាលអស់ហេីយ​។ ចំណែកស្ថានភាពក្នុងវត្តវិញ​ មិនមានការឆ្លងបន្តទៀតទេនៅពេលនេះ។ សូមជ្រាបជាព័ត៌មាន​ សូមអរគុណ​។