អនុគណៈកម្មការស្រាវជ្រាវជំងឺកូវីដ១៩ រកឃើញទីតាំងថ្មីអ្នកជំងឺកូវីដ-១៩ ដែលជាបុគ្គលិកធានាគារABA សាខាសន្ធម៉ុក និងអ្នកទិញទំនិញនៅផ្សារទំនើបឡាក់គី សាខាជ្រោយចង្វារ
រាជធានីភ្នំពេញ៖ យោងតាមការបញ្ជាក់ពី អនុគណៈកម្មការស្រាវជ្រាវជំងឺកូវីដ១៩ រកឃើញ០២ទីតាំង ដែលអ្នកជំងឺកូវីដ១៩ ជាបុគ្គលិកធ្វើការនៅធានាគារ ABA សាខាសន្ធម៉ុក និងអ្នកជំងឺកូវីដ១៩ បានទៅទិញអីវ៉ាន់នៅឡាក់គី (Lucky Market) សាខារង្វង់មូលតាព្រហ្ម ដោយអនុគណៈកម្មការស្រាវជ្រាវជំងឺកូវីដ១៩ បានឲ្យដឹងថា៖
ផ្សារទំនើបឡាក់គី (Lucky Market) សាខារង្វង់មូលតាព្រហ្ម ជ្រោយចង្វារ ដែលមានទីតាំងស្ថិតនៅសង្កាត់ជ្រោយចង្វារ ខណ្ឌជ្រោយចង្វារ នៅថ្ងៃទី០១ ខែមិថុនា ឆ្នាំ២០២១ ម៉ោង ១០៖៥០ ដល់ម៉ោង ១១៖៣០ ដោយមូលហេតុ អ្នកជំងឺកូវីដ១៩ បានទៅទិញអីវ៉ាន់មួយចំនួននៅទីតាំងខាងលើនេះ។ អ្នកប៉ះពាល់ មិនទាន់បានទៅយកសំណាកនៅឡើយគិតត្រឹមព្រឹកថ្ងៃទី០៤ ខែមិថុនានេះ។ អ្នកធ្វើការនៅទីតាំងខាងលើនេះ បានចាក់វ៉ាក់សាំងរួចរាល់គ្រប់គ្នា។
ចំណែកធនាគារ ABA សាខាសន្ធម៉ុក ដែលមានទីតាំងស្ថិតនៅអគារលេខ៥៧១ ផ្លូវកម្ពុជាក្រោម សង្កាត់ផ្សារដេប៉ូ៣ ខណ្ឌទួលគោក ចាប់ពីថ្ងៃទី២១ ខែឧសភា ដល់ថ្ងៃទី០១ ខែមិថុនា ឆ្នាំ២០២១ ដោយមូលហេតុ៖ អ្នកជំងឺកូវីដ១៩ ជាបុគ្គលិកធ្វើការនៅទីតាំងខាងលើនេះ។ ក្រោយពីតេស្ដលើកទី១ បានរកឃើញ អ្នកវិជ្ជមានម្នាក់ទៀត ក្នុងចំណោម អ្នកប៉ះពាល់ផ្ទាល់ជាមួយអ្នកជំងឺ។
ដើម្បីសុវត្ថិភាព សូមដាក់ខ្លួន ដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬបានទៅទីកន្លែងនេះ ប្រសិនបើអ្នកមានអាការៈមិនស្រួល សូមទៅធ្វើតេស្ដជាបន្ទាន់!
