សមត្ថកិច្ចកោះហៅបុរសម្នាក់មកបំភ្លឺ និងបានសារភាពទទួលកំហុស ករណីបង្ហោះព័ត៌មានមិនពិតថា «មានជនជាតិចិនមួយក្រុមរត់ចេញពីកន្លែងធ្វើចត្តាឡីស័ក»
នៅរសៀលថ្ងៃទី១១ ខែមិថុនា ឆ្នាំ២០២១ កម្លាំងជំនាញនៃអធិការដ្ឋាននគរបាលខណ្ឌដូនពេញ បានធ្វើការកោះហៅ បុរសម្នាក់ឈ្មោះ អ៊ួង សារឿន ដែលជាម្ចាស់គណនី Tik Tok ដែលបានផុសវីដេអូ ដែលជាព័ត៌មានមិនពិតថា មានជនជាតិមួយក្រុមមានគ្នា ០៥នាក់បានរត់ចេញពីកន្លែងធ្វើចត្តាឡីស័ក ជាក់ស្តែងបុរសម្ចាស់គណនី Tik Tok នេះបានចូលខ្លួនមកបំភ្លឺចំពោះសមត្ថកិច្ចថា ជាព័ត៌មានមិនពិត មិនមានជនជាតិជនណាម្នាក់រត់ចេញពីកន្លែធ្វើចត្តាឡីស័កនោះទេ ក្រុមជនជាតិចិននោះគ្រាន់តែជិះរថយន្តមកទីនោះហើយឈប់រកកន្លែងបត់ជើងតូចតែប៉ុណ្ណោះ ។
នៅចំពោះមុខសមត្ថកិច្ច បុរសម្នាក់នេះបានសារភាពទទួលកំហុស និងបានធ្វើការសុំទោសជាសាធារណ:ដែលខ្លួនបានផុសព័ត៌មានមិនពិតនេះដែលធ្វើឲ្យប្រជាពលរដ្ឋ និងមជ្ឈដ្ឋានទូទៅមានការយល់ច្រឡំ ។ ក្រោយពីធ្វើការសុំទោសរួចរាល់ សមត្ថកិច្ចបានអប់រំណែនាំឈ្មោះ អ៊ួង សារឿន រួចក៏បានឲ្យសាមីខ្លួនវិលត្រលប់ទៅផ្ទះវិញ ៕
ប្រភព៖ អគ្គស្នងការដ្ឋាននគរបាលជាតិ