ប្រទេសឥណ្ឌានៅថ្ងៃព្រហស្បតិ៍ ទី១៧ ខែមិថុនា ឆ្នាំ២០២១ បានកត់ត្រាករណីជំងឺ COVID-19 ថ្មីចំនួន ៦៧,២០៨ ករណី និងការស្លាប់ដែលទាក់ទងនឹងជំងឺចំនួន ២,៣៣០ ករណី ក្នុងរយៈពេល ២៤ ម៉ោងចុងក្រោយនេះ នេះបើយោងតាមព័ត៌មានពីក្រសួងសុខាភិបាល។ ជាមួយនឹងតួលេខនេះវាធ្វើឱ្យចំនួនករណីឆ្លងនៅទូទាំងប្រទេសបានកើនឡើងដល់ ២៩,៧០០,៣១៣ ករណី ហើយចំនួនអ្នកស្លាប់បានកើនឡើងដល់ ៣៨១,៩០៣ ករណី។ ជម្រាបដែរថា នេះជាថ្ងៃទី១០ ជាប់ៗគ្នាមកហើយ ដែលករណីប្រចាំថ្ងៃរបស់ឥណ្ឌានៅតែស្ថិតក្រោម ១០០,០០០ ករណី។

ក្រសួងសុខាភិបាលឥណ្ឌាកាលពីម៉ោង ៨ ព្រឹក ក៏បានប្រកាសថា មានមនុស្សចំនួន ១០៣,៥៧០ នាក់ បានជាសះស្បើយ និងរំសាយចេញទៅផ្ទះ ក្នុងរយៈពេល ២៤ ម៉ោងចុងក្រោយនេះ ដែលបានធ្វើឱ្យការជាសះស្បើយសរុបនៅក្នុងប្រទេសមានចំនួន ២៨,៤៩១,៦៧០ ករណី។ ចំណែកករណីសកម្មបានធ្លាក់ចុះមកនៅត្រឹម ៨២៦,៧៤០​ ករណី ហើយបន្ទុកឆ្លងថ្មីមានតែ ២.៩២% ប៉ុណ្ណោះ។ គិតត្រឹមថ្ងៃព្រហស្បតិ៍នេះ ពលរដ្ឋសរុបចំនួន ៣៨៥,២៣៨,២២០ បានធ្វើតេស្តិ៍រកជំងឺ COVID-19 ខណៈមាន ១,៩៣១,២២៩ នាក់ បានសាកល្បងក្នុងរយៈពេល ២៤ ម៉ោងចុងក្រោយនេះ៕

អត្ថបទ៖ លីដា
ប្រភព៖ hindustan Times