ប្រទេសវៀតណាមនៅតែបន្ដប្រឈមនឹងថ្ងៃអាក្រក់របស់ខ្លួន ជាមួយនឹងករណីថ្មីចំនួន ១,៤៣៨ ករណី ដែលត្រូវបានកត់ត្រាសម្រាប់របាយការណ៍ពេលព្រឹកព្រលឹម នេះបើតាមការចុះផ្សាយរបស់សារព័ត៌មាន VNexpress នៅថ្ងៃសុក្រ ទី១៦ ខែកក្កដា ឆ្នាំ២០២១។ ក្នុងចំណោមករណីថ្មីៗសម្រាប់ព្រឹកនេះ មានករណីចំនួន ១,០៧១ ត្រូវបានរកឃើញក្នុងទីក្រុងហូជីមិញ បូករួមករណីចំនួន ៩៤០ ដែលចេញពីកន្លែងធ្វើចត្តាឡីស័ក និងករណីចំនួន ១៣១ ផ្សេងទៀត មិនទាន់រកប្រភពឃើញនៅឡើយ។

ចាប់តាំងពីមានរលកទី៤ ដែលជាបញ្ហាប្រឈមបំផុតដែលវៀតណាមបានជួបប្រទះ ប្រទេសនេះបានកត់ត្រាករណីជំងឺ COVID-19 សរុបចំនួន ៣៨,៦៧៥ ករណី នៅក្នុងទីក្រុងនិងខេត្ត ៥៨ របស់ខ្លួន។ ទីក្រុងហូជីមិញកំពុងនាំមុខគេជាមួយនឹងការឆ្លងថ្មីៗ ដោយមានការឆ្លងសរុបទាំងអស់ ២២,៥៦៤ នាក់ ហើយក្រសួងសុខាភិបាលបាននិយាយកាលពីថ្ងៃព្រហស្បតិ៍ថា ទីក្រុងនេះគួររំពឹងថានឹងមានករណីខ្ពស់ជាងនេះទៀតនៅប៉ុន្មានថ្ងៃខាងមុខនេះ។ ចំណែកឯតួលេខចាក់វ៉ាក់សាំងវិញ ប្រទេសវៀតណាមបានចាក់វ៉ាក់សាំងឱ្យពលរដ្ឋបាន ៤.១៨ លាននាក់ហើយ ខណៈមានពលរដ្ឋចំនួន ២៩៤,៦៧៦ បានទទួលបានទាំង ២ លើក៕

អត្ថបទ៖ លីដា
ប្រភព៖ VNexpress