ប្រទេសឥណ្ឌារកឃើញករណីជំងឺកូវីដ១៩ ថ្មីចំនួន ៣៨,១៦៤ ករណី និងមរណភាព ៤៩៩ ករណី នៅក្នុងរយៈពេល ២៤ ម៉ោងចុងក្រោយនេះ

យោងតាមការចុះផ្សាយរបស់សារព័ត៌មាន រ៉យទ័រ នៅថ្ងៃច័ន្ទ ទី១៩ ខែកក្កដា ឆ្នាំ២០២១ បានរាយការណ៍ថា ប្រទេសឥណ្ឌាបានកត់ត្រាករណីជំងឺ COVID-19 ថ្មីចំនួន ៣៨,១៦៤ ករណី និងការស្លាប់ថ្មីចំនួន ៤៩៩ ករណី នៅក្នុងរយៈពេល ២៤ ម៉ោងចុងក្រោយនេះ។ តួលេខនៅថ្ងៃនេះ នាំឱ្យប្រទេសឥណ្ឌាមានករណីជំងឺ COVID-19 សរុបចំនួន ៣១,១៤៤,២២៩ ករណី និងការស្លាប់សរុប ៤១៤,១០៨ ករណី ប៉ុន្តែយ៉ាងណាប្រទេសនេះមាននិន្នាការឆ្លងធ្លាក់ចុះជាបន្តបន្ទាប់។

ឥឡូវករណីសកម្មបានធ្លាក់ចុះដល់ ៤២១,៦៦៥ ករណី ដែលស្មើនឹង ១.៣៥% នៃករណីឆ្លងសរុប ខណៈអត្រានៃការជាសះស្បើយមានរហូតដល់ទៅ ៩៧.៣២% ។ ចំណែកចំនួននៃការធ្វើតេស្ដរកជំងឺ COVID-19 សរុបចំនួន ១,៤៦៣,៥៩៣ ករណី ត្រូវបានធ្វើឡើងកាលពីថ្ងៃអាទិត្យម្សិលមិញ ដែលធ្វើឱ្យចំនួននៃការធ្វើតេស្ដបានកើនឡើងដល់ ៤៤៥,៤២២,២៥៦ ករណី ខណៈករណីឆ្លងជាប្រចាំមានតែ ២.៦១% ប៉ុណ្ណោះ ក្នុងរយៈពេល ២៨ ថ្ងៃកន្លងមកនេះ៕

អត្ថបទ៖ លីដា
ប្រភព៖ រ៉យទ័រ