ប្រទេសវៀតណាមបានបញ្ជាក់ពីករណីថ្មីនៃជំងឺ COVID-19 ក្នុងសហគមន៍ចំនួន ១៤,៩២២ ករណី កាលពីយប់ថ្ងៃសុក្រ ទី០៣ ខែកញ្ញា ឆ្នាំ២០២១ ដែលជាចំនួនឆ្លងច្រើនបំផុតទី២ ដែលខ្លួនធ្លាប់បានកត់ត្រា ខណៈចំនួនឆ្លងច្រើនបំផុតគឺ ១៧,៤០៩ ករណី ដែលត្រូវបានបញ្ជាក់កាលពីថ្ងៃទី២៧ ខែសីហា កន្លងទៅ។ ទីក្រុងហូជីមិញបាននាំមុខគេជាមួយនឹងការឆ្លងថ្មីៗនេះ ជាមួយនឹងករណីចំនួន ៨,៤៩៩ ករណី ដេញពីក្រោយដោយមជ្ឈមណ្ឌលឧស្សាហកម្មខេត្តប៊ិញឌួង ៣,៦៧៦ ករណី និងខេត្តដុងណៃ ៩៨៦​ ករណី។

ការស្លាប់ថ្មីៗចំនួន ៣៣៨ ករណី ក៏ត្រូវបានកត់ត្រានៅថ្ងៃសុក្រផងដែរ ដោយអ្នកជំងឺ ២៥០នាក់ ក្នុងចំណោមពួកគេ ត្រូវបានរកឃើញនៅទីក្រុងហូជីមិញ ខណៈមានអ្នកជំងឺចំនួន ១១,៣៤៤ នាក់ ត្រូវបានប្រកាសថាបានជាសះស្បើយ និងរំសាយចេញពីមន្ទីរពេទ្យ។ គួរឱ្យដឹងដែរថា ប្រទេសវៀតណាមបានកត់ត្រាករណីជំងឺ COVID-19 ចំនួន ៥០១,៦៤៩ ករណី ចាប់តាំងពីការផ្ទុះឡើងនៃជំងឺរាតត្បាតជាលើកដំបូង ហើយប្រជាជនចំនួន ២០.៨៣ លាននាក់ បានទទួលវ៉ាក់សាំងយ៉ាងហោចណាស់ ១ដូស និង ២.៩៦ លាននាក់ ក្នុងចំណោមពួកគេបានទទួលវ៉ាក់សាំងគ្រប់ចំនួនដូស៕

អត្ថបទ៖ លីដា
ប្រភព៖ VNexpress