ចំនួនករណីជំងឺ COVID-19 នៅឯសហរដ្ឋអាមេរិក បានកើនដល់ ៥០លានករណី គិតត្រឹមថ្ងៃអាទិត្យ ទី១២ ខែធ្នូ ឆ្នាំ២០២១ នេះបើយោងតាមរបាយការណ៍របស់ រ៉យទ័រ ខណៈដែលវ៉ារ្យ៉ង់ ដែលតា បានបន្តគំរាមកំហែងដល់ប្រជាជនអាមេរិក ហើយវ៉ារ្យ៉ង់ អូមីក្រុង ក៏កំពុងបន្ថែមបន្ទុកដល់ប្រទេសមួយនេះ។ បន្ទាប់ពីរយៈពេល ២ខែ នៃការថយចុះករណីនៃការឆ្លងថ្មីៗ សហរដ្ឋអាមេរិកបានចាប់ផ្ដើមមើលឃើញពីការកើនឡើងនូវការឆ្លងឡើងវិញក្នុងចំនួនច្រើន ហើយភាគច្រើនគឺជាវ៉ារ្យ៉ង់ ដែលតា តែម្ដង។

ជាក់ស្ដែងរដ្ឋមួយចំនួននៅតំបន់ត្រជាក់ កំពុងមើលឃើញពីការកើនឡើងក្នុងចំនួនច្រើន រួមមានរដ្ឋ Vermont, New Hampshire និង Michigan។ ចំណែកចំនួនអ្នកជំងឺ COVID ដែលសម្រាកព្យាបាលនៅមន្ទីរពេទ្យក៏កំពុងកើនឡើងផងដែរ ដែលកើនឡើង ២០% ចាប់តាំងពីថ្ងៃបុណ្យ Thanksgiving នៅចុងខែវិច្ឆិកា។ ក្នុង​រយៈពេល ១ ​ខែ​កន្លង​ទៅ​នេះ ការ​ស្លាប់​បាន​កើន​ឡើង ៤.៦% ដែលធ្វើឱ្យ​ចំនួន​អ្នក​ស្លាប់​ក្នុង​ប្រទេស​បាន​កើន​លើស ៨០០,០០០​នាក់៕

អត្ថបទ៖ លីដា
ប្រភព៖ រ៉យទ័រ