ក្លឹបបាល់ទាត់បារាំង Paris Saint-Germain កាលពីថ្ងៃអាទិត្យ ទី០២ ខែមករា ឆ្នាំ២០២២ បានប្រកាសថា កំពូលតារាបាល់ទាល់ឆ្នើម Lionel Messi និងសមាជិក ៣ នាក់ផ្សេងទៀត បានធ្វើតេស្តវិជ្ជមានចំពោះជំងឺ COVID-19 នេះបើតាមការចុះផ្សាយដោយសារព័ត៌មាន NHK ។ យ៉ាងណាក៏ដោយ ក្លឹប​ PSG មិន​បាន​ធ្វើ​អត្ថាធិប្បាយ​ពី​ស្ថានភាព​សុខភាព​របស់​ពួកគេ​ទេ ប៉ុន្តែ​បាន​និយាយ​ថា​ពួកគេ​កំពុងនៅផ្ដាច់ខ្លួនពីគេ​។

ប្រព័ន្ធផ្សព្វផ្សាយបានរាយការណ៍ថា Messi បានត្រលប់មកផ្ទះវិញនៅប្រទេសអាហ្សង់ទីនដើម្បីចំណាយពេលវិស្សមកាលរបស់គាត់ ហើយគាត់បានតេស្តវិជ្ជមានជាមួយ COVID-19 នៅអំឡុងពេលនោះ។ ពួកគេ​និយាយ​ថា​ វា​មិន​ប្រាកដ​ថា​ពេល​ណា​ដែល​គាត់​នឹង​អាច​ត្រឡប់​ទៅ​ប្រទេស​បារាំង ឬ​ក៏​អាចចូលរួមជាមួយក្រុម​​នៅពេលណាទេ។ គួរឱ្យដឹងដែរថា ចំនួនករណីឆ្លងជំងឺ COVID-19 បាននិងកំពុងកើនឡើងនៅក្នុងប្រទេសអាហ្សង់ទីន ចាប់តាំងពីពាក់កណ្តាលខែធ្នូ ជាមួយនឹងករណីថ្មីជាង ៥០,០០០ ករណី កាលពីថ្ងៃព្រហស្បតិ៍ នេះបើតាមរបាយការណ៍របស់សាកលវិទ្យាល័យ Johns Hopkins ៕

អត្ថបទ៖ លីដា
ប្រភព៖ NHK