សម្ដេចតេជោ ហ៊ុន សែន ប្រកាសយកវិធានការពលរដ្ឋត្រូវមានវ៉ាក់សាំងយ៉ាងតិច៣ដូសក្នុងខ្លួន ដើម្បីងាយស្រួលដល់ការបើកប្រទេសគ្មានការត្រឡប់ក្រោយនូវការបើកសេដ្ឋកិច្ច-សង្គម
រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឲ្យដឹងថា ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានប្រកាសយកវិធានការធ្វើយ៉ាងណាប្រជាពលរដ្ឋត្រូវមានវ៉ាក់សាំងយ៉ាងតិច៣ដូស ក្នុងខ្លួនគ្រប់ៗគ្នា ដើម្បីបង្កើតនូវភាពស៊ាំសហគមន៍ឱ្យបានកាន់តែខ្ពស់ ក៏ដូចជា ឈានឆ្ពោះទៅរកការបន្ធូរបន្ថយទាំងស្រុង ឬមួយផ្នែកធំនៃវិធានការសុខាភិបាល និងងាយស្រួលទៅដល់ការបើកទាំងស្រុងដោយគ្មានការត្រឡប់ក្រោយនៃការបើកសេដ្ឋកិច្ច-សង្គម ឡើងវិញនោះ។
ក្នុងសារពិសេសជាសំឡេង នារសៀលថ្ងៃទី២៤ ខែមេសា ឆ្នាំ២០២២ សម្ដេចតេជោ ហ៊ុន សែន មានប្រសាសន៍ថា ចាប់តាំងពីមុនចូលឆ្នាំខ្មែរហូតមដល់ពេលនេះ យើងបានពិនិត្យឃើញថា ភាពស៊ាំសហគមន៍ បាននាំទៅដល់កម្រិតនៃការឆ្លងតិចតួចតាំងពីមុនចូលឆ្នាំរហូតមកដល់ក្រោយចូលឆ្នាំនៅត្រឹមថ្ងៃនេះ ពុំមានសញ្ញាណានៃការកើនឡើងនៃការរីករាលដាលនៃការឆ្លងនោះទេ។ បន្ទាប់ពីការប្រកាសឱ្យខេត្តចំនួន៤ បានសម្រេចចិត្តដោយប្រជាជនខ្លួនឯងថា ពាក់ម៉ាស ឬមិនពាក់ម៉ាសដែលមិនមែនជាកាតព្វកិច្ចទៀតនោះ យើងកំពុងតែពិនិត្យអំពីការដាក់បន្ថែមនៅខេត្ត ឬដែនដីក្នុងខេត្តខ្លះថែមទៀត ដើម្បីកាត់បន្ថយការប្រើប្រាស់ម៉ាស កាត់បន្ថយការចំណាយរបស់ប្រជាពលរដ្ឋរបស់យើង ទៅលើការទិញម៉ាសសម្រាប់ការពាក់។ វិធានការអស់ទាំងនេះ វាសំខាន់ក៏បានមកពីភាពស៊ាំសហគមន៍ តាមរយៈការចាក់វ៉ាក់សាំងបាន២ដូសរួចរាល់។
សម្ដេចតេជោបានគូសបញ្ជាក់ថា «ប៉ុន្តែអ្វីដែលជាតម្រូវការដើម្បីឈានទៅសម្រេចនៃភាពស៊ាំសហគមន៍ និងដើម្បីកាត់បន្ថយនៅការបន្ធូរបន្ថយនូវវិធានការសុខាភិបាល ដូចជាបញ្ហាការជួបជុំ ឬបញ្ហាការពាក់ម៉ាសជាដើម សំខាន់ស្ថិតនៅលើភាពស៊ាំសហគមន៍ដោយវ៉ាក់សាំង ហើយដែលខ្ញុំព្រះករុណា ខ្ញុំ សូមប្រកាសយកវិធានការធ្វើយ៉ាងណាប្រជាជនកម្ពុជាហោចបំផុតឱ្យមានវ៉ាក់សាំង៣ដូសក្នុងខ្លួនគ្រប់ៗគ្នា»។
សម្ដេចតេជោបានលើកឡើងថា មកដល់ពេលនេះ វ៉ាក់សាំងដូសទី៣ទើបនឹងចាក់បានចំនួនជាង ៨លាននាក់តែប៉ុណ្ណោះ។ ដូច្នេះហើយនៅមានការខ្វះខាតចំនួនប្រមាណជាង៦លាននាក់ទៀតដែលយើងត្រូវការចាក់។ សម្ដេចតេជោនាយករដ្ឋមន្ត្រី ក៏បានធ្វើការណែនាំចំពោះគណៈកម្មការចំពោះកិច្ចសម្រាប់ការចាក់វ៉ាក់សាំង ដើម្បីផ្ដោតការយកចិត្តទុកដាក់ទៅលើទីកន្លែងដែលមានមនុស្សច្រើន នោះគឺពាក់ព័ន្ធជាមួយនឹង កម្មករ កម្មការិនី នៅតាមរោងចក្រ កម្មករ កម្មការិនី សំណង់ អ្នករកស៊ីក្រៅប្រព័ន្ធ ក៏ដូចជា អាជីវករ អ្នកលក់ដូរនៅតាមផ្សារ ជាដើម ដែលងាយនឹងឆ្លង ដោយខិតខំប្រមូលផ្ដុំកម្លាំងដើម្បីចាក់វ៉ាក់សាំងជូនអ្នកទាំងនោះ។
សម្ដេចតេជោអះអាងថា ធ្វើយ៉ាងដូច្នេះ គឺយើងនឹងបង្កើតបាននូវភាពស៊ាំសហគមន៍បានកាន់តែខ្ពស់ ការលើកលែងអំពីការប្រើម៉ាស់ និងតម្រូវការមួយចំនួនផ្សេងទៀត ទាក់ទងជាមួយនឹងវិធានការសុខាភិបាល ក៏ត្រូវបានបន្ធូរបន្ថយ ដែលជាការកាត់បន្ថយនូវការចំណាយមួយចំនួនពីសំណាក់ប្រជាពលរដ្ឋរបស់យើង ដែលយើងធ្លាប់តែបានធ្វើក្នុងរយៈពេលកន្លងទៅ ហោចណាស់ក្នុងវិធានការ ៣កាពារ និង៣កុំ ជាពិសេស៣ការពារ យើងអាចដកហូតបាននូវការពាក់ម៉ាស់ ឬក៏អាចនឹងការកាត់បបន្ថយគម្លាត អំពីបញ្ហាគម្លាត វាមានការចាំបាច់ ឬមិនមានការចាំបាច់យ៉ាងណានោះ វាក៏អាស្រ័យទៅលើបញ្ហាទាក់ទិនជាមួយនឹងរឿងភាពស៊ាំសហគមន៍។
សម្ដេចតេជោបានថ្លែងបញ្ជាក់ថា «យើងបានឃើញថាក្នុងរយៈពេលបុណ្យចូលឆ្នាំនេះ បងប្អូនយើងប៉ះពាល់គ្នាច្រើនណាស់ ក៏ប៉ុន្តែមិនមានការឆ្លងទេ។ អីចឹងទេ បញ្ហាវិធានការផ្នែកសុខាភិបាល ខ្ញុំទុកជូនផ្នែកសុខាភិបាលធ្វើការណែនាំបន្តបន្ទាប់ពីការដកម៉ាសចេញហើយនោះ»។ សម្ដេចតេជោថ្លែងសង្កត់ធ្ងន់ថា« ប៉ុន្តែអ្វី ដែលខ្ញុំសូមអំពាវនាវចំពោះប្រជាពលរដ្ឋរបស់យើង មិនថាកម្មករ កម្មការិនីទេ ប្រជាជនទាំងអស់នៅទូទាំងព្រះរាជាណាចក្រកម្ពុជា ត្រូវតែបានចាក់វ៉ាក់សាំងដូសទី៣ ជាការចាំបាច់ នេះជាការតម្រូវដើម្បីឈានឆ្ពោះទៅរកការបន្ធូរបន្ថយទាំងស្រុង ឬមួយផ្នែកធំនៃវិធានការសុខាភិបាល សម្រាប់ការពារការឆ្លងនូវជំកូវីដ១៩»។
សម្ដេចតេជោបានស្នើឱ្យលោកជំទាវ ឱ វណ្ណឌីន សហការគ្រប់កម្លាំងទាំងអស់បើកយុទ្ធនាការ ដើម្បីចាក់វ៉ាក់សាំងជូនកម្មករ កម្មការិនី នៅគ្រប់រាជធានី ខេត្ត ដែលមានរោងចក្រសហគ្រាស ដែលមានកម្មករសំណង់ និងអ្នកសេដ្ឋកិច្ចក្រៅប្រព័ន្ធ និងអ្នកដែលរកស៊ីទាំងឡាយណា ដែលងាយរងនៅហានិភ័យ ធ្វើយ៉ាងម៉េចឱ្យពួកគាត់បានដូសទី៣ ជាចាំបាច់ ហើយបើសិនជាគាត់បានទទួលដូសទី៤ ក៏កាន់តែប្រសើរ។ ប៉ុន្តែអ្វីដែលជាសំណូមពរអប្បបរមារបស់សម្ដេចគឺសំណូមពរដ៏ទាបបំផុតនោះ គឺដូសទី៣។
សម្ដេចតេជោបានបន្ថែមថា «ដូច្នេះសូមបងប្អូនជនរួមជាតិស្ម័គ្រចិត្តមកចូលចាក់វ៉ាក់សាំង ហើយអ្នកដែលត្រូវចាក់ ខ្ញុំបានណែនាំលោកជំទាវ ឱ វណ្ណឌីន អំពីការអនុវត្តវិធានការចាក់វ៉ាក់សាំងជូនបងប្អូន ទោះបីថាពេលវេលាមិនទាន់គ្រប់ ក៏យើងអាចចាក់បាន ដើម្បីយើងប្រើប្រាស់ឱ្យអស់លទ្ធភាពនូវអ្វីដែលយើងមាននៅក្នុងដៃ ដើម្បីពង្រឹងភាពស៊ាំសហគមន៍ និងដើម្បីងាយស្រួលទៅដល់ការបើកទាំងស្រុង ហើយដោយគ្មានការត្រឡប់ក្រោយនូវការបើកសេដ្ឋកិច្ច-សង្គម ក្នុងពេលវេលាដែលយើងរៀនរស់នៅជាមួយកូវីដ១៩»។
សម្ដេចតេជោប្រមុខរាជរដ្ឋាភិបាលបានបញ្ជាក់បន្ថែមថា យើងមិនមានអ្នកស្លាប់ និងអ្នកឆ្លងច្រើនទេ ដូច្នេះយើងអាចជំរុញដំណើរការរបស់យើងទៅមុខទៀតបានសំខាន់គឺការចូលរួមពីសំណាក់ប្រជាពលរដ្ឋរបស់យើងទទួលយកវ៉ាក់សាំង។ បន្ថែមជាមួយគ្នានេះ គឺការចាត់ចែងពីគណៈកម្មាការចំពោះកិច្ចសម្រាប់ការចាក់វ៉ាក់សាំងទូទាំងប្រទេស គឺប្រើប្រាស់កម្លាំងឱ្យត្រូវ ដើម្បីយុទ្ធនាការចាក់វ៉ាកសាំដូសទី៣នេះទទួលបានជោគជ័យ ដោយយកចិត្តទុកដាក់សម្រាប់និស្សិត យុវវ័យ សិស្សានុសិស្ស និងកុមារ។ ដូច្នេះ បងប្អូនប្រជាពលរដ្ឋត្រូវមានវ៉ាក់សាំងយ៉ាតិច៣ដូសនៅក្នុងខ្លួន ដើម្បីការពារជំងឺដ៏កាចសាហាវនេះ៕
ប្រភព៖ ក្រសួងព័ត៌មាន