ទីភ្នាក់ងារសារព័ត៌មានរដ្ឋស៊ីនហួរបានរាយការណ៍ថា អតីតមេដឹកនាំចិនលោក Jiang Zemin ដែលបានដឹកនាំប្រទេសឆ្លងកាត់សម័យកាលមានការផ្លាស់ប្តូរ ពីចុងទសវត្សរ៍ឆ្នាំ១៩៨០ ឈានចូលសហវត្សថ្មីនោះ បានទទួលមរណភាព នៅថ្ងៃពុធ ទី៣០ ខែវិច្ឆិកា នេះផ្ទាល់ នៅក្នុងអាយុ ៩៦ឆ្នាំ។ លោក Jiang Zemin បានឡើងកាន់អំណាចបន្ទាប់ពីមានការបង្ក្រាបនៅទីលានធានអានមេន ហើយបានដឹកនាំប្រទេសដែលមានប្រជាជនច្រើនបំផុតនៅលើពិភពលោកមួយនេះ ឆ្ពោះទៅរកភាពជាមហាអំណាចនៅលើឆាកពិភពលោក។

នៅពេលដែលលោក Jiang ឡើងជំនួសតំណែងជាប្រធានបក្សកុម្មុយនិស្តចិនពីលោក Deng Xiaoping នៅឆ្នាំ១៩៨៩ ប្រទេសចិននៅតែស្ថិតក្នុងដំណាក់កាលដំបូងនៃទំនើបកម្មសេដ្ឋកិច្ចនៅឡើយ ហើយលោកបានឡើងជាប្រធានាធិបតីពីឆ្នាំ១៩៩៣ ដល់ឆ្នាំ ២០០៣។ នៅពេលគាត់ចូលនិវត្តន៍ពីប្រធានាធិបតី ប្រទេសចិនបានក្លាយជាសមាជិកនៃអង្គការពាណិជ្ជកម្មពិភពលោក ទីក្រុងប៉េកាំងបានធានាបាននូវព្រឹត្តិការណ៍កីឡាអូឡាំពិកឆ្នាំ២០០៨ ហើយប្រទេសទាំងមូលស្ថិតក្នុងដំណើរឆ្ពោះទៅកាន់ឋានៈជាមហាអំណាចពិភពលោក៕ លោកត្រូវបានមើលថែដោយភរិយាឈ្មោះ Wang Yeping និងកូនប្រុសចំនួន ២ នាក់ផងដែរ៕

អត្ថបទ៖ លីដា
ប្រភព៖ Channel News Asia