រាជធានីភ្នំពេញ៖ យោងតាមការចុះផ្សាយរបស់ មន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា នៅព្រឹកថ្ងៃទី១៦ ខែមករា ឆ្នាំ២០២៣ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញចាក់បេតុងតភ្ជាប់ស្ពានខ្សែកាបឫស្សីកែវឆ្លងកាត់ទន្លេសាប។

ស្ពានខ្សែកាបនេះ មានប្រវែង ៦៤២ម ទទឹង ២០.៥ម មានសសរទាញខ្សែកាបចំនួន ៤ កំពស់ ៤០មធៀបនឹងកម្រាលស្ពាន។ គិតត្រឹមថ្ងៃនេះ ការដ្ឋានសាងសង់សម្រេចបាន ៩៣% នៃគម្រោង ដែលនឹងបញ្ចប់ទាំងស្រុងនៅដើមខែមេសាឆ្នាំ២០២៣នេះ។

សូមជម្រាបថា ស្ពានបេតុងខ្សែកាបថ្មីនេះ ឆ្លងកាត់ទន្លេសាបពីក្រុងរណបជ្រោយចង្វារ និងផ្លូវជាតិលេខ៦ មកកាន់ផ្លូវជាតិលេខ ៥។ ស្ពានថ្មីនេះនឹងជួយសម្រួលឱ្យការដឹកជញ្ជូនទំនិញ និងការធ្វើដំណើរផ្សេងៗចេញពីខេត្តនានាមកកាន់រាជធានីភ្នំពេញ និងពីរាជធានីភ្នំពេញទៅកាន់ខេត្តនានា ដែលកំពុងមានកំណើនការធ្វើចរាចរណ៍ជាប្រចាំ។ ស្ពាននេះចំណាយថវិកាសាងសង់ប្រមាណ ៣៥ លានដុល្លារ៕

ប្រភព៖ មន្ទីរសាធារណការ និងដឹកជញ្ជូនរាជធានីភ្នំពេញ