ការបរិភោគអាហារ ចៀន ឬបំពង អាចធ្វើឱ្យអ្នកអាយុខ្លី ដោយសារជំងឺមហារីក បេះដូង ឬជំងឺផ្សេងៗ…

ការស្រាវជ្រាវមួយបានបង្ហាញថា ការទទួលទានអាហារចៀន ជាពិសេសសាច់មាន់ និងត្រី បង្កើនហានិភ័យនៃការឆាប់ស្លាប់។ ដោយអ្នកឯកទេសបានរកឃើញថា អាហារប្រភេទចៀន និងបំពង មួយចាន ឬច្រើនជាងហ្នឹងក្នុងមួយថ្ងៃ ដូចជា៖ នំចៀន ឬសាច់គោ មាន់បំពង -ល- នឹងបង្កើនហានិភ័យនៃការឆាប់ស្លាប់ដល់ទៅ ៨% បើប្រៀបធៀបទៅនឹងអ្នកមិនចូលចិត្តញ៉ាំអាហារប្រភេទចៀន ឬបំពងនេះ។

ចំណែកការស្រាវជ្រាវដែលត្រូវបានចុះផ្សាយនៅក្នុងទស្សនាវដ្តីវេជ្ជសាស្ត្រអង់គ្លេស (BMJ) ក៏បានរកឃើញថា សាច់មាន់ ត្រី ឬអាហារបំពងបែបមានប្រេង ឬខ្លាញ់ច្រើន ត្រូវបានផ្សារភ្ជាប់ទៅនឹងហានិភ័យខ្ពស់នៃការឆាប់ស្លាប់។ ក្នុងនោះអ្នកចូលចិត្តបរភោគសាច់មាន់បំពង មានហានិភ័យ ១៣% ពីការស្លាប់ដោយសារជំងឺផ្សេងៗ និង ១២% ពីការស្លាប់ដែលទាកទង់ជាមួយនឹងជំងឺបេះដូង។ ទន្ទឹមនឹងនេះដែរការញ៉ាំ ត្រី និងប្រភេទគ្រឿងសមុទ្រដូចជា៖ ខ្យង ខ្ចៅ លៀស គ្រំ -ល- ដែលយកទៅចៀន ឬបំពង មួយចាន ឬច្រើនចានក្នុងមួយថ្ងៃ ក៏ត្រូវបានផ្សារភ្ជាប់ទៅនឹងការកើនឡើងហានិភ័យនៃការស្លាប់នៃជំងឺផ្សេងៗ ៧% និងពីហានិភ័យនៃការស្លាប់ដែលទាក់ទងនឹងជំងឺបេះដូង ១៣% ផងដែរ។

ការស្រាវជ្រាវនេះបានធ្វើទៅលើស្ត្រី ១០៦,៩៦៦នាក់ ដែលមានអាយុចន្លោះពី ៥០ឆ្នាំ ទៅ ៧៩ឆ្នាំ ដែលបានចុះឈ្មោះក្នុងការសិក្សាស្រាវជ្រាវសុខភាពស្រ្តី (WHI) រវាងឆ្នាំ ១៩៩៣ និង ១៩៩៨ ។ រយៈពេល ១៨ឆ្នាំ មកនេះ ស្ត្រីចំនួន ៣១,៥៥៨នាក់ បានស្លាប់ ដោយក្នុងនោះស្ត្រី ៩,៣២០នាក់ ស្លាប់ដោយបញ្ហាបេះដូង ៨,៣៥៨ ពីមហារីកនិង ១៣,៨៨០នាក់ ពីមូលហេតុផ្សេងៗ៕

អត្ថបត៖ លីដា
ប្រភព៖ dailymail