ម៉ាឡេស៊ី៖ ស្រ្តីវ័យ ៦៤ឆ្នាំម្នាក់ត្រូវបានគេប្រទះឃើញស្ពាយកាតាបទៅរៀនថ្នាក់មហាវិទ្យាល័យនៅក្នុងចំណោមយុវជនក្មេងៗជាច្រើន ហើយក្នុងនោះក៏មានទាំងចៅរបស់គាត់ទៀតផង នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីថ្ងៃសុក្រ​ ទី១០ ខែមីនាម្សិលមិញនេះ។ ស្រ្តីរូបនេះមានឈ្មោះថា Ku Meriam Ku Hussain ជនជាតិម៉ាឡេស៊ី ហើយបច្ចុប្បន្ននេះគឺរូបគាត់កំពុងបន្តការសិក្សានៅក្នុងមជ្ឈមណ្ឌលគ្រប់គ្រងនៃសាកលវិទ្យាល័យ Sains Malaysia ដែលស្ថិតនៅក្នុងរដ្ឋ Penang ភាគខាងជើងនៃ​ប្រទេសម៉ាឡេស៊ី។

ប្រភពខាងលើបានបន្តថា លោកស្រី Ku Meriam Ku Hussain គឺជាអតីតគ្រូបង្រៀនមេរៀនសាសនា​ និងទើបចូលនិវត្តន៍ពីការងារកាលពីប៉ុន្មានឆ្នាំចុងក្រោយនេះ។ ចំពោះជីវិតឯកជនវិញគឺលោកស្រីមានកូនចំនួន ៦នាក់ ចៅចំនួន ១០នាក់ ខណៈប្តីរបស់គាត់បានស្លាប់ដោយជំងឺមហារីកកាលពីឆ្នាំ ២០១៣ កន្លងទៅ។ នៅក្នុងចំណោមចៅទាំង ១០នាក់របស់គាត់នោះក៏មានចៅស្រីម្នាក់កំពុងទៅសិក្សានៅក្នុងសាកលវិទ្យាល័យជាមួយគាត់ផងដែរ។ លោកស្រី Ku Meriam Ku Hussain បានប្រាប់ឲ្យដឹងថា មូលហេតុដែលគាត់សម្រេចទៅរៀនទាំងរូបគាត់មានវ័យចំណាស់ទៅហើយនោះក៏ព្រោះតែរូបគាត់មិនចង់ទុកខ្លួនឲ្យទំនេរ ហើយរូបគាត់ពិតជារីករាយក្នុងការមានជីវិតមមាញឹកណាស់៕

អត្ថបទ៖ ភក្តី

ប្រភព៖ The Strait Time