SEA GAMES
ប្រធាន EFC អះអាងថា កម្ពុជាត្រៀមខ្លួនធ្វើម្ចាស់ផ្ទះ ស៊ីហ្គេម បានរួចរាល់ ខណៈប្រទេសចូលរួមកើនឡើងជាងស៊ីហ្គេមមុនៗ
យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ឯកឧត្តម ជា ច័ន្ទបរិបូរណ៍ រដ្ឋលេខាធិការ ក្រសួងព័ត៌មាន និងជាប្រធានសហព័ន្ធកីឡាអេឡិចត្រូនិកកម្ពុជា(EFC)គូសបញ្ជាក់ក្នុងសប្តាហ៍នេះថា សម្រាប់ប្រភេទកីឡាអេឡិចត្រូនិកកម្ពុជាបានត្រៀមខ្លួនរួចរាល់ សម្រាប់ការទទួលរៀបចំធ្វើម្ចាស់ផ្ទះ កីឡាស៊ីហ្គេម លើកទី៣២ នាខែឧសភា ឆ្នាំ២០២៣ ខណៈប្រទេសដែលបានចុះឈ្មោះចូលរួមប្រកួតជាមួយកម្ពុជា មានរហូតដល់១០ប្រទេសផ្សេងទៀត ពោលគឺប្រទេស១១ក្នុងអាស៊ីអាគ្នេយ៍នឹងត្រូវប្រជែងមេដាយ ដោយចំនួននេះបានកើនឡើងជាងស៊ីហ្គេម មុនៗ។ ឯកឧត្តមប្រធានសហព័ន្ធបន្ថែមថា៖ «យើងបានត្រៀមខ្លួនរួចរាល់អស់ហើយ ក្នុងការឈានទៅធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។ យើងទាំងអស់គ្នានឹងខិតខំបន្តទៅទៀត ខណៈពេលវេលានៅសល់ត្រឹមតែខើចទៅៗ (សល់៤៩ថ្ងៃ គិតត្រឹមថ្ងៃទី១៧ ខែមីនា ឆ្នាំ២០២៣) ដោយប្រភេទកីឡា E-Sport នេះត្រូវរៀបចំប្រព័ន្ធ Sever System ដើម្បីត្រៀមនឹងការចូលរួមរបស់ប្រទេសទាំងអស់»។

ឯកឧត្តម ជា ច័ន្ទបរិបូរណ៍ បានសង្កត់ធ្ងន់ថា ពេលនេះយើងកំពុងមមាញឹកខ្លាំង ក្នុងការរៀបចំទីលាន បច្ចេកទេស ពីព្រោះនេះជាការប្រកួតកីឡាប្រព័ន្ធបច្ចេកវិទ្យា។ «យើងកំពុងខិតខំធ្វើយ៉ាងណាឱ្យការទទួលរៀបចំការប្រកួតកីឡាស៊ីហ្គេមនេះឱ្យមានលក្ខណៈល្អប្រសើរ ក្នុងនាមជាម្ចាស់ផ្ទះជាលើកដំបូង។ មកដល់ពេលនេះមិនមានប្រទេសណាមួយបានដកខ្លួននោះទេ ដោយមានតែចង់មកប្រកួត។ សម្រាប់ស៊ីហ្គេម លើកទី៣២ ឆ្នាំ២០២៣ មានសរុប១១ប្រទេស ក្នុងនោះមានប្រទេសទីម័រខាងកើត១ទៀត ដែលបានចុះឈ្មោះចូលរួមប្រកួតលើប្រភេទកីឡាអេឡិចត្រូនិកនៃព្រឹត្តិការណ៍កីឡាស៊ីហ្គេម នៅកម្ពុជាយើង»។ នេះជាការលើកឡើងបន្ថែមរបស់ឯកឧត្តម ជា ច័ន្ទបរិបូរណ៍។
ឯកឧត្តមប្រធានសហព័ន្ធបានកត់សម្គាល់ឃើញថា E-Sport កម្ពុជាបង្ហាញពីមោទនភាព សម្រាប់ការត្រៀមខ្លួនចូលរួមប្រកួតស៊ីហ្គេម នៅកម្ពុជា មានរហូតដល់១១ប្រទេស (រួមទាំងម្ចាស់ផ្ទះកម្ពុជា) ដែលស៊ីហ្គេម ២លើកចុងក្រោយ កន្លងមក ដូចជាការប្រកួតកីឡាស៊ីហ្គេម លើកទី៣០ នៅប្រទេសហ្វីលីពីន កាលពីឆ្នាំ២០១៩ និងស៊ីហ្គេម លើកទី៣១ នៅទីក្រុងហាណូយ ប្រទេសវៀតណាម កាលពីឆ្នាំ២០២២ មានត្រឹមតែ១០ប្រទេសប៉ុណ្ណោះ។ ឯកឧត្ដមបានថ្លែងបញ្ជាក់ថា៖ «ដូច្នេះ ជាមួយនឹងមោទនភាពនេះ ក្នុងនាមជាម្ចាស់ផ្ទះ យើងក៏ត្រូវប្រឹងប្រែងដូចគ្នាផងដែរ ដោយក្រៅពីការរៀបចំឲ្យមានតម្លាភាព យើងក៏ត្រូវប្រឹងប្រែងរៀបចំក្រុមកីឡាករអេឡិចត្រូនិក ត្រៀមប្រកួតប្រជែងមេដាយជូនជាតិផងដែរ»។
គួរបញ្ជាក់ថា យោងតាមសេចក្តីប្រកាសព័ត៌មានរបស់សហព័ន្ធកីឡាអេឡិចត្រូនិកកម្ពុជាបានកំណត់បង្ហាញនូវវិញ្ញាសាចំនួន៩ សម្រាប់ដាក់ឱ្យប្រកួតស៊ីហ្គេម លើកទី៣២ ឆ្នាំ២០២៣ ដោយមានដូចជា វិញ្ញាសា AK2 (PC) ក្រុម-ឯកត្តជន, PUBG Mobile ក្រុម-ឯកត្តជន, Mobile Legends: Bang Bang(Mobile) ក្រុមបុរស-ក្រុមនារី, League of Legends: Wild Rift (Mobile) ក្រុម, Valorant (PC) ក្រុម និងវិញ្ញាសា CrossFire (PC) ជាក្រុម៕



ប្រភព៖ ក្រសួងព័ត៌មាន
SEA GAMES
កម្ពុជាឈរលេខ១ ថ្ងៃបើកឆាកការប្រកួតកីឡាវ៉ូវីណាមជើងឯកអាស៊ីអាគ្នេយ៍ នៅរាជធានីភ្នំពេញ
រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន នៅថ្ងៃទី២៨ ខែមីនា ឆ្នាំ២០២៣ បានឱ្យដឹងថា ក្នុងនាមជាម្ចាស់ផ្ទះ កម្ពុជាបានក្តាប់ដំណែងចំណាត់ថ្នាក់លេខ១ បណ្តោះអាសន្នក្នុងចំណោម៧ប្រទេស ដែលចូលរួមប្រកួតកីឡាវ៉ូវីណាម ជើងឯកអាស៊ីអាគ្នេយ៍ លើកទីទី៦ ពីថ្ងៃទី២៥-៣០ ខែមីនា ឆ្នាំ២០២៣ នៅសាលសាកវិទ្យាលល័យភូមិន្ទភ្នំពេញ រាជធានីភ្នំពេញ។

នៅថ្ងៃប្រកួតទី១ កាលថ្ងៃទី២៧ ខែមីនា ឆ្នាំ២០២៣ ក្រុមអត្តពលិកវ៉ូវីណាមម្ចាស់ផ្ទះកម្ពុជា ដែលឈរនៅចំណាត់ថ្នាក់លេខ១នេះ គឺដណ្តើមបានមេដាយមាស៥គ្រឿង ប្រាក់២ និងសំរឹទ្ធ២គ្រឿង ខណៈវៀតណាម ដែលជាម្ចាស់ក្បាច់គុន ឈរនៅលេខ២ ជាមួយមេដាយមាស២ ប្រាក់៤។ រីឯលេខ៣ ថៃ មេដាយមាស១ ប្រាក់២ និងសំរឹទ្ធ២ ស្របពេល មីយ៉ាន់ម៉ា ឈរលេខ៤ ជាមួយមេដាយមាស១ ប្រាក់១ និងសំរឹទ្ធ៦។ ចំពោះ៣ប្រទេសទៀត ដូចជាឥណ្ឌូណេស៊ី ឡាវ និងហ្វីលីពីន មិនទាន់ដណ្តើមបានមេដាយមាសនោះទេ នៅថ្ងៃទី១នេះ ប៉ុន្តែដណ្តើមបានមេដាយសំរឹទ្ធដូចៗគ្នា។ សម្រាប់ការប្រកួតនៅថ្ងៃដំបូងនេះទើបនឹងបានបញ្ចប់លើ៩វិញ្ញាសាប៉ុណ្ណោះ ក្នុងចំណោម៣០វិញ្ញាសា ដែលដាក់ឱ្យប្រកួតក្នុងព្រឹត្តិការណ៍ជើងឯកអាស៊ីអាគ្នេយ៍ លើកទី៦ ប្រចាំឆ្នាំ២០២៣។
ថ្លែងក្នុងឱកាសបើកការប្រកួតជាផ្លូវការ ឯកឧត្តម ម៉ុង គឹមហោង រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានសហព័ន្ធកីឡាវ៉ូវីណាមអាស៊ីអាគ្នយ៍មានប្រសាសន៍ថា តាងនាមឱ្យសមាជិកគណៈកម្មាធិការប្រតិបត្តិរបស់សហព័ន្ធកីឡាវ៉ូវីណាមអាស៊ីអាគ្នេយ៍ ឯកឧត្តមបានស្វាគមន៍ជាពិសេសចំពោះប្រតិភូ គ្រូបង្វឹក គ្រូជំនួយ កីឡាករ កីឡាការិនីជាតិ និងអន្តរជាតិទាំងអស់។ ឯកឧត្ដមបន្ដថា នេះជាលើកទី១ ហើយដែលឯកឧត្តមបានដឹកនាំ និងចូលរួមរៀបចំការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៦នេះ ក្នុងគោលបំណងដើម្បីវាស់ស្ទង់កម្រិតបច្ចេកទេសរបស់កីឡាករ កីឡាការិនី មន្ត្រីបច្ចេកទេស អាជ្ញាកណ្ដាល ចៅក្រម ដើម្បីត្រៀមលក្ខណៈចូលរួមប្រកួត និងដឹកនាំរៀបចំការប្រកួតព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ។
ឯកឧត្តមគូសបញ្ជាក់យ៉ាងដូច្នេះថា៖ «យើងសង្កេតឃើញថាការចូលរួមប្រកួតលើកនេះមានលក្ខណៈផុសផុលជាងការប្រកួតនានា ដែលមានការចូលរួមពីប្រទេសដូចជា៖ ប្រទេសថៃ ឡាវ មីយ៉ាន់ម៉ា ហ្វីលីពីន ឥណ្ឌូណេស៊ី វៀតណាម និងកម្ពុជា។ ទាំងនេះសបញ្ជាក់ឱ្យឃើញថា ក្រោមការដឹកនាំដ៏ឆ្លាតវាងវៃ និងប៉ុនប្រសព្វរបស់សម្តេចអគ្គមហាសេនាបតីតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតធ្វើឱ្យប្រទេសកម្ពុជាមានសុខសន្តិភាព និងមានការអភិវឌ្ឍវិស័យអប់រំកាយ និងកីឡា និងការត្រៀមលក្ខណៈរៀបចំធ្វើជាម្ចាស់ផ្ទះនៃការស៊ីហ្គេមលើកទី៣២ ឆ្នាំ២០២៣»។
បន្ថែមពីលើនេះ ឯកឧត្តមប្រធានសហព័ន្ធកីឡាវ៉ូវីណាមអាស៊ីអាគ្នេយ៍កីបានបង្ហាញនូវការថ្លែងអំណរគុណយ៉ាងជ្រាលជ្រៅដល់ក្រសួងអប់រំ យុវជន និងកីឡា និងគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) ដែលបានផ្ដល់ថវិកាសម្រាប់ដំណើរការប្រកួត និងឯកឧត្តម ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញ ដែលជានិច្ចកាលតែងតែសហការ និងផ្ដល់ទីតាំងសម្រាប់រៀបចំដំណើរការប្រកួតគ្រប់សកម្មភាពកីឡា៕



ប្រភព៖ ក្រសួងព័ត៌មាន